हामी सबैकाे संसारन्यूज

काठमाडौं । नेकपा (माओवादी केन्द्र)का उपमहासचिव वर्षमान पुन ‘अनन्त’ले सुन तस्करी काण्डको संसदीय वा न्यायिक छानबिन समिति बनाउन प्रस्ताव गरेका छन् । प्रधानमन्त्री निवास बालुवाटारमा सोमबार बिहान बसेको माओवादी केन्द्रको पदाधिकारी बैठकमा उनले यस्तो प्रस्ताव गरेका हुन् ।

बैठकमा सुन तस्करी प्रकरणलाई लिएर कतिपयले उपप्रधान तथा गृहमन्त्री नारायणकाजी श्रेष्ठ, उपाध्यक्ष कृष्णबहादुर महरा र आफ्नो नाम जोडेको भन्दै उनले सत्यतथ्य छानबिनको माग गरे । पुनले दोषी देखिए जस्तोसुकै सजाय भोग्न तयार रहेको बताउँदै अरु पनि तयार हुनुपर्ने बताएका छन् ।

“अनुसन्धानमा विज्ञ निकाय, न्यायिक वा संसदीय छानबिन समिति जे उपयुक्त हुन्छ बनाउँदा हुन्छ, यो प्रकरणको छानबिन हुनैपर्छ”, पुनले पदाधिकारी बैठकमा भनेका छन्, “हामी नेताहरू, हाम्रा आफन्तहरू वा ज-जसको अपराधमा संलग्नता देखिन्छ, त्यसले सजाय भोग्नुपर्छ। जेल जान तयार हुनुपर्छ।”

सय केजी सुन तस्करी प्रकरणमा आइतबार चिनियाँ मुलका बेल्जियमका नागरिक दावा छिरिङ्ग पक्राउ परेका थिए । पक्राउ परेका छिरिङ्गको राजनीतिक तहमा सम्बन्ध रहेको तथ्यहरु बाहिर आएका छन् । वर्षमान पुन, पूर्वराष्ट्रपति नन्दकिशोर पुनलगायतसँग सम्बन्ध रहेको विषय बाहिरिएका छन् । जसलाई पुनले पनि स्वीकार गरेका छन् ।

पार्टी पदाधिकारी बैठकमा नेता पुनले छिरिङ्गसँग आठ वर्ष अगाडि भेटघाट भएको बताएका छन् । तर, पक्राउ परेका छिरिङ्गसँग अन्य कुनै साइनो नभएको पुनको दाबी छ । आफ्नो नाम मुछिएपछि पुनले छानबिन समिति गठनको माग गरेका हुन् ।