हामी सबैकाे संसारन्यूज

काठमाडौं । नक्कली शैक्षिक प्रमाणपत्र प्रकरणमा पक्राउ परेका सांसद तथा नेपाली कांग्रेसका नेता शुनिल शर्माले एमालेका अध्यक्ष केपी शर्मा ओलीलाई भेटेका छन् ।

आइतबार बिहान ओली निवास बालकोट पुगेर केपी ओलीलाई भेटेका शर्माले बाहिर निस्कने क्रममा ओलीलाई फेरि प्रधानमन्त्री बनाउने भन्ने प्रतिक्रिया पत्रकार समक्ष दिएका थिए ।

‘बा’ लाई फेरि प्रधानमन्त्री बनाउने हो । शेरबहादुर देउवालाई पनि प्रधानमन्त्री बनाउने हो । शेखर कोइराला गगन थापा सबै बन्दै जान्छन्,’ पत्रकारहरुसँगको प्रतिक्रियामा उनले भने ।

उनले आफुलाई बिना पुर्जी घरबाट पक्रेर कस्टडीमा हाल्ने भनेको सामान्य हो भन्दै प्रतिप्रश्न गर्दै प्रधानमन्त्री र गृहमन्त्रीलाई आतंककारीको आरोप समेत लगाए ।‘ यस्तो आतंककारी प्रधानमन्त्री र गृहमन्त्रीले एक मिनेट पदमा बस्ने अधिकार छ ?’ उनले भने,’ अलिकति पनि नैतिकता छ भने राजीनामा दिनुपर्छ । रोल्पा र रुकुममा बसेर एके ४७ चलाको हो । यो लोकतन्त्र हो । पावरमा छु भनेर जे पनि गर्न पाइन्छ ?’

उनले जनताको म्यान्डेट कांग्रेस र एमाले मिलेर सरकार चलाउ भनेको बताउँदै एमाले र कांग्रेस मिलेर सरकार चलाउनुपर्ने समेत बताए ।

नोबेल कलेज र केएमसी अस्पतालका संचालक रहेका शर्मालाई नेपाल प्रहरीको केन्द्रीय अनुसन्धान ब्यूरो (सीआईबी) ले एमबीबीएस पढ्दा पेश गरेको आईएस्सीको प्रमाणपत्र नक्कली रहेको विषयमा छानविनका लागि भन्दै  बिहीवार पक्राउ गरेको थियो । यद्यपी उनलाई शुक्रबार जिल्ला अदालतले थुनामा राख्न नपर्ने आदेश दिएपछि उनी रिहा भएका थिए ।