हामी सबैकाे संसारन्यूज

काठमाडौं । सुन काण्डमा नाम मुछिएपछि माओवादी केन्द्रका उपाध्यक्ष कृष्णबहादुर महराका पुत्र राहुल महराले पहिलो पटक सार्वजनिकरुपमा धारणा राखेका छन् । सामाजिक सञ्जालमार्फत उनले आफ्नो परिवारविरुद्ध नियोजितरुपमा प्रहार भइरहेको बताएका छन् ।

महराले कतिपय सञ्चारमाध्यम आफैं न्यायालय बनेर आफूहरुलाई दोषी सावित गरेको भन्दै महराले दुःखेसो पोखेका छन् । उनले कसैसँग सम्बन्ध हुँदैमा अपराधी भइनहाल्ने जिकिर गरेका छन् ।

सामाजिक सञ्जालमार्फत उनले भनेका छन्, “हामीले यसअघि नै बिषय स्पष्ट पारिसकेका छौं कि कोही व्यक्तिसँग सम्पर्क हुदैमा, केही बुझिदिएकै कारण आपराधिक कार्यमा संलग्न भएको हो भनेर प्रचारबाजी गरिनु र समाचार लेखी भ्रमित पार्नु गलत हो ।”

विद्युतीय चुरोट (भेप)मा लुकाएर ल्याइएको सुनमा कतिपय सञ्चारमाध्यमले कृष्णबहादुर महराका बाउ–छोराको संलग्नता भएको बताइरहेका छन् । प्रहरीको केन्द्रीय अनुसन्धान ब्यूरो (सीआईबी) र जिल्ला सरकारी वकिलको कार्यालयले किटानी गरेको भएपनि सरकारले मुद्दा नचलाएको सञ्चार माध्यमको जिकिर छ । तर, यसबारे प्रहरीले सार्वजनिकरुपमा कुनै प्रष्टोक्ती दिएको छैन ।

यस्ताे छ राहुल महराले सामाजिक सञ्जालमा लेखेकाे स्टाटस

हाम्रो विषयमा केही दिनयता विभिन्न सञ्चारमाध्याममा बारम्बार आइरहेका आरोपहरुप्रति गम्भीर आपत्तिसहित दुःख व्यक्त गर्दछौं। पुष्टि नभएको र प्रहरीले अनुसन्धान गरिरहेको विषयमा बारम्बार एकोहोरो आरोप लगाएर चरित्र हत्या गर्ने र राजनीतिक जीवन नै सिध्याउन खोज्ने गलत कार्यको भत्र्सना गर्दछौं।

सञ्चारमाध्यामले पुष्टि नभएको विषयमा बारम्बार आरोप लगाएर जबर्जस्त पुष्टि गराउन खोज्नु गलत मात्र होइन, आफै न्यायालय बन्न खोज्नु हो । संचारमाध्यम बाट एकहोरो आक्रमण हुनु को पछाडी हामीले बुझ्न सकेका छैनौ ।

हामीले यसअघि नै बिषय स्पष्ट पारिसकेका छौं कि कोही व्यक्तिसँग सम्पर्क हुदैमा, केही बुझिदिएकै कारण आपराधिक कार्यमा संलग्न भएको हो भनेर प्रचारबाजी गरिनु र समाचार लेखी भ्रमित पार्नु गलत हो।

राज्यको निकायले अनुसन्धान गरिरहेको बिषयलाई हामीले पूर्ण रुपमा सहयोग गर्ने कुरामा प्रष्ट पारेका छौं र प्रमाणित देखिए कानुन बमोजिम भागिदार हुनेछौ ।

२०८०।०४।२९