हामी सबैकाे संसारन्यूज

नयाँदिल्ली। संयुक्त राष्ट्रसङ्घका महासचिव एन्टोनियो गुटेर्रेसले जी–२० नेताहरूको शिखर सम्मेलनको पूर्वसन्ध्यामा चेतावनी दिँदै विश्व राष्ट्रहरूबीचको विभाजन बढ्दै जाँदा विश्वले द्वन्द्वको जोखिम सामना गरिरहेको बताएका छन् ।

गुटेर्रेसले नयाँ दिल्लीमा पत्रकारसँग भने, “यदि हामी वास्तवमै एक वैश्विक परिवार हौँ भने आज हामी एक निष्क्रिय परिवारजस्तो देखिन्छौँ ।”

“विभाजन बढ्दै गएको छ, तनाव बढिरहेको छ, र विश्वास कम हुँदै गएको छ, जसले एकसाथ विखण्डनको खतरा हुँदै अन्ततः, टकराव बढाउँछ ।

विश्वको कूल गार्हस्थ्य उत्पादनका लगभग ८५ प्रतिशत र विश्व जनसङ्ख्याको दुई–तिहाई हिस्सा ओगटेको जी–२० प्रमुख अर्थव्यवस्थाहरूको समूहमा हाल १९ देशहरू र युरोपेली सङ्घ छन् । तर युक्रेनमा रुसको युद्ध र जलवायु परिवर्तनसँग जुध्न उदीयमान राष्ट्रहरूलाई कसरी सहयोग गर्ने भन्ने विषयमा गहिरो असहमतिले नयाँदिल्लीमा हुने दुईदिने बैठकमा सम्झौताहरूमा बाधा पुग्ने अपेक्षा गरिएको छ ।

गुटेर्रेसले भने, “यो विभाजन सबैभन्दा राम्रो समयमा गहिरो चिन्ताको विषय हुनेछ, तर हाम्रो समयमा यसले विपत्ति निम्त्याउँछ ।”

उनले प्रसङ्गलाई जोड्दै भने, “हाम्रो विश्व सङ्क्रमणकालको कठिन घडीमा छ । भविष्य बहुध्रुवीय छ, तर हाम्रा बहुपक्षीय संस्थाहरूले बितेको युगलाई प्रतिविम्बित गर्छन् ।”

“विश्वव्यापी वित्तीय संरचना पुरानो, निष्क्रिय र अनुचित छ । यसका लागि गहिरो, संरचनागत सुधारको आवश्यकता छ र संयुक्त राष्ट्रसङ्घ सुरक्षा परिषद्को बारेमा पनि यही भन्न सकिन्छ ।

संयुक्त राज्य अमेरिका र भारतसँग बढ्दो व्यापार र भूराजनीतिक तनावको समयमा चीनका राष्ट्रपति सी चिनफिङले जी–२० को बैठकमा भाग नलिने बताए ।

कूटनीतिक दमन र युद्ध अपराधको आरोपले रुसी नेता भ्लादिमिर पुटिनलाई पनि टाढा राखेको छ, यद्यपि मस्कोले आफ्ना सहयोगीहरूलाई युक्रेनमाथिको आक्रमणको अन्तर्राष्ट्रिय निन्दालाई कम गर्न दबाब दिइरहेको छ । (रासस/एएफपी)