हामी सबैकाे संसारन्यूज

काठमाडौं । ललिता निवासको जग्गा हिनामिना प्रकरणमा प्रक्राउ परेकाहरुलाई धरौटीमा छाड्न जिल्ला अदालत काठमाडौंले आदेश दिएको छ ।

जिल्ला अदालतका न्यायाधिश भोलानाथ ढकालको इजलासले उक्त प्रकरणमा पक्राउ परेका मध्ये एक केशव तुलाधरलाई सामान्य तारेखमा छाड्न आदेश दिँदै अन्य सबै आरोपिलाई धरौटीमा छाड्ने आदेश दिएको हो ।

बालुवाटारस्थित सरकारी जग्गा हिनामिना प्रकरणमा अदालतले मुख्य योजनाकार मानिएका भाटभटेनी सुपरमार्केटका सन्चालक मीनबहादुर गुरुङसँग सबैभन्दा बढी धरौटी माग गरेको छ । गुरुङसँग २ करोड ४६ लाख धरौटी माग गरिएको हो ।

त्यस्तै अन्य आरोपित कलाधर देउजा र विनोद पौडेलसँग १५÷१५ लाख धरौटी माग गरिएको छ भने नारायण मिश्र, गोपाल कार्की, घमनकुमार कार्की, लोकहरि घिमीरे, अरुणकुमार श्रेष्ठ, नारायणराज मिश्र, योगराज पौडेल, रुद्रकुमार श्रेष्ठ र बालकृष्ण श्रेष्ठसँग प्रतिव्यक्ति ७ लाख ५० हजारका दरले धरौटी माग गरिएको बताइएको छ ।

त्यसैगरी शिवजी भट्ट, ध्रुवराज अर्यालसँग जनही ३ लाख ५० हजार र अन्य आरोपि सन्जयकुमार महर्जन, देवनारायण मर्हजन, बाबुराजा महर्जन र सकलानन्द महर्जनसँग १ लाख १० हजार रुपैयाँका दरले धरौटी माग गरिएको छ ।

प्रहरीको केन्द्रीय अनुसन्धान व्युरो (सीआइबी) ले गत भदौ ५ गते उक्त प्रकरणमा गरेको अनुसन्धानको प्रतिवेदन सरकारी वकिलको कार्यालय काठमाडौंलाई बुझाएको थियो । सिआइवीले उक्त मुद्दामा मृत्यु भइसकेका २१ सहित ३१० जनालाई प्रतिवादी बनाएको थियो । सोहि प्रकरणका केही प्रतिवादी फरार रहेका थिए ।