Sansar News
काठमाडौं । कोशी प्रदेशका मुख्यमन्त्री हिक्मत कार्कीले आज मन्त्रिपरिषद् विस्तार गर्दैछन् ।
गत २२ भदौमा सर्वोच्च अदालतको परमादेशबाट मुख्यमन्त्रीमा नियुक्त भएका मुख्यमन्त्री कार्कीले सोहिदिन तीनजना मन्त्री र एक राज्यमन्त्री नियुक्त गर्दै सानो आकारको मन्त्रिपरिषद् बनाएका थिए । कार्कीले विश्वासको मत लिने समय घर्किदै जान लाग्दा आज मन्त्रिपरिषद् विस्तार गर्न लागेका हुन् ।
मुख्ममन्त्री कार्कीले नेकपा एमालेका ४ जना प्रदेश सांसदलाई मन्त्रीमा नियुक्त गर्न लागेको बताइएको छ । यद्यपी मन्त्री को–को बन्दैछन् भनेर नाम सार्वजनिक भने गरिएको छैन ।
नेकपा एमाले प्रदेश प्रमुख सचेतक रेवती रमणका अनुसार एमालेबाटै चारजना मन्त्री थप हुने र उनीहरुको सपथ दिउँसो तीनबजे हुनेछ ।
नेकपा एमाले प्रदेश संसदीय दलका नेता कार्कीले गत २२ भदौमा मुख्यमन्त्रीमा नियुक्त भएको १ महिनामा विश्वासको मत लिनुपर्ने संवैधानिक व्यवस्था अनुसार यहि असोज २१ गतेभित्रमा प्रदेशसभाबाट विश्वासको मत लिनेछन् । कोशी प्रदेशमा हाल पाँचकर्ण राई वन तथा वातावरण, तिलकुमार मेन्याङ्वो ऊर्जा, एकराज कार्की भौतिक पूर्वाधार मन्त्री रहेका छन् भने सिर्जना राई सामाजिक विकास राज्यमन्त्री रहेकी छन् ।
वि.सं.२०८० असोज ८ सोमवार १३:५२ मा प्रकाशित
