Sansar News
काठमाडौं । इन्द्रजात्रा हेर्न विदेशबाट काठमाडौं महानगरपालिकामा पर्यटक आएका छन् । काठमाडौं महानगरको निमन्त्रणामा यँया (इन्द्रजात्रा) अवलोकनका लागि ३ वटा देशका ५ वटा नगर र एउटा संस्थाबाट प्रतिनिधित्व गर्दै २० जना अतिथि काठमाडौँ आएका हुन् । यस्तै आन्तरिक भगिनी सम्बन्ध भएका सहरहरुबाट प्रमुखसहित प्रतिनिधिहरु आएका छन् ।
मौलिक प्रविधि, सिप र कला जोडेर सिर्जना गरेका मूर्त सम्पदासँग अमूर्त सम्पदाको सम्बन्धको अवलोकन गर्न महानगरपालिकाले भगिनी तथा संस्थागत सम्बन्ध भएका नगरबाट प्रमुख र प्रतिनिधिलाई आमन्त्रण गरेको थियो ।
महानगरका अनुसार अतिथि पर्यटहरुले भोलि भक्तपुर दरबार क्षेत्रको भ्रमण गर्ने छन् । त्यसपछि आर्ट ग्यालेरीको अवलोकन हुनेछ । भोलि नै हाँडीगाउँमा आयोजना हुने मौलिक तथा परम्परागत प्रदर्शनीमा अतिथिहरु सहभागी हुनेछन् । १३ गते स्वयम्भूको अवलोकन भ्रमणपछि अतिथिहरुलाई नेपाली बजार घुम्ने समय उपलब्ध गराइनेछ । असोज १४ गते उनीहरु स्वदेश फर्किने छन् ।
वि.सं.२०८० असोज ११ बिहीवार १३:४४ मा प्रकाशित
