हामी सबैकाे संसारन्यूज

काठमाडौं । राष्ट्रिय सभा निर्वाचनका लागि आज मतदाताको नामावली प्रकाशन गरिने भएको छ । राष्ट्रिय सभाका १९ सदस्य चयन गर्न आगामी माघ ११ गते हुने चुनावका लागि निर्वाचन आयोगले मतदाताहरूको अन्तिम नामावली प्रकाशन गर्ने भएको हो ।

आयोगका अनुसार राष्ट्रिय सभा सदस्य निर्वाचनका लागि २ हजार ४७ जना मतदाता छन् । गत पुस २० गते निर्वाचन अधिकृतको कार्यालयमा सार्वजनिक मतदाता नामावलीमा कोही छुटेको भए समावेश गर्न, कुनै मतदाताको नाम, थर, उमेर, पद आदि विवरण सच्याउनु पर्ने भए सच्याउन र मतदाताको विरोधमा उजुरी दिनुपर्ने भए सम्बन्धित निर्वाचन अधिकृतको कार्यालयमा निवेदन दिन भनिएको थियो ।

ती सबै प्रक्रिया पूरा गरेर निर्वाचन आयोगले आज (आइतबार) अन्तिम मतदाता नामावली प्रकाशन गर्न लागेको हो ।

राष्ट्रिय सभाका २० सदस्यको कार्यकाल आगामी फागुन २० गते सकिँदै छ । तीमध्ये १९ जना चुनावबाट चुनिनेछन् भने एकजना सरकारको सिफारिसमा राष्ट्रपतिले मनोनयन गर्नेछन् ।

राष्ट्रिय सभामा पद खाली हुनुभन्दा एक महिनाअगावै निर्वाचन गरी पदपूर्ति गर्ने कानुनी व्यवस्था छ । उक्त चुनावका लागि भोलि (पुस २३ गते) सातै प्रदेशमा उम्मेदवारी दर्ताको कार्यक्रम छ ।