हामी सबैकाे संसारन्यूज

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले मङ्गलवार बजेट पुस्तिका च्यातेका छन् । उनले प्रतिनिधि सभामा मन्त्रालयगत बजेटमाथिको छलफलका क्रममा प्रतिनिधिसभाको रोष्ट्रमममै भौतिक पूर्वाधार मन्त्रालयको बजेट पुस्तिका च्यातेका हुन् ।

‘म आफूलाई हेर्दा कम आक्रोश पोख्ने, कम रिसाउन मान्छे हो । तर, रिस कहिलेकाहीँ रिस उठ्छ, सेलाउछ ।’ प्रतिनिधि सभाको रोष्ट्रमबाट पुस्तीका च्यात्दै उनले भने, ‘जब भौतिक पूर्वाधार मन्त्रालयको बजेटको पुस्तिका हातमा पर्यो त्यो दिनदेखि म यसरी तातिएको छु कि यसरी च्यातेर हुर्याउने मन छ । तर, यो संसदीय मर्यादा विपरीत हुन्छ भनेर यहाँ (पोडियम) राख्छु मैले ।’

‘सामान्य लाज पनि नराख्ने, देख्छन्, यो पढिने चिज हो भन्ने लाज पनि नराख्ने जिल्लाको नाम पनि नराख्ने, ६२/६३ अगाडि पनि योजना छनोटका प्रक्रिया थिए । बस्ती तहबाट योजनाहरू छनोट हुन्थे । आठ/नौ वटा चरण पार गरेर बल्ल योजना छनोट हुन्थ्यो ।’ लिङ्देनले थपे, ‘अहिले मन्त्रीको मुखबाट र गोजीबाट निस्कने चिर्कटोबाट बजेट निर्माण हुन्छ ।’

उनले राप्रपाले लामो समयदेखि यो प्रक्रियामाथि औँला ठडाउँदै आएको बताए । उनले अहिलेको प्रक्रिया र व्यवस्था गलत पुष्टि भइसकेको दाबी गरेका छन् ।  ‘मैले जनताको प्रतिनिधिको तर्फबाट आक्रोश पोखेको हो । अहिलेको प्रक्रियाले यो व्यवस्था चाँडो भत्काउन सहयोग गरेको छ ।’ उनले भौतिक पूर्वाधार मन्त्री रघुवीर महासेठलाई प्रश्न गरेका छन्, ‘एउटा निर्वाचन क्षेत्रमा अर्बौँ पार्नुपर्ने कुन कारण र कुन विधि हो ?’

मन्त्री महासेठले बजेट बनाउँदा विधि भत्काएको उनले बताए । ‘अर्कोले पनि मन्त्री बन्न ढुकेर बस्नुपर्यो । बनेपछि त्यसै गर्नुपर्यो । तपाईंले देशमा विधि भत्काउने काम गर्नुभएको छ’, उनले भने ।