हामी सबैकाे संसारन्यूज

काठमाडौं । नेपाली कांग्रेसका सांसद मोहनबहादुर बस्नेतले राजस्व चुहावट रोक्न टेरामक्स प्रणाली ल्याएको बताएका छन् । शुक्रबार प्रतिनिधि सभाको बैठकमा पूर्वमन्त्री समेत रहेका उनले नेपाल दूरसञ्चार प्राधिकरणबाट विवादास्पद टेरामक्स प्रणाली खरिदमा भएको अनियमिततामा आफू संलग्न नभएको बताए

बस्नेतले दुरसञ्चार क्षेत्रको कम आवागमनमा हुने राजस्व चुहावट रोक्न यो प्रविधि खरिद गरिएको भन्दै त्यसमा आफू संलग्न भएको बताए ।

‘टेरामक्सको कुरालाई लिएर पनि बेला बेलामा तीन जना सांसदहरुको नाम मुछिएको छ । यसका बारेमा मेरो पनि नाम उठने गरेको छ’ सांसद बस्नेतले भने, ‘एकदम कलिला माननीयज्युहरुदेखि दारीजुँगा फुलेका माननीय ज्युहरुसम्मले यो कुरा उठाइरहनुभएको छ । उचित दिन आएछ भने म यसको जवाफ दिनेछु ।’ तर, टेरामक्स प्रणाली खरिद नहुदा मुलुकमा वार्षिक २५ अर्ब बढी राजश्व चुहावट भइरहेको उनको जिकिर थियो ।

‘टेरामक्स एउटा यस्तो विधि हो जसले टेलिफोनमा कल बाइपास गरेर खाने धन्दालाई नियन्त्रण गर्छ । संसारभर यही विधिले नियन्त्रण गरेको छ ।’ बस्नेतले भने, ‘नेपाल मात्रै एउटा त्यस्तो देश हो जहाँ कल बाइपास गरेर अबौं बर्षको २५ अर्ब भन्दा बढी राजस्व घोटाला भएको छ ।’

घोटालामा संलग्नहरुले नै बिभिन्न व्यक्तिमाथि आरोप लगाएर विषयान्तरको प्रयास भइरहेको भनाई थियो ।