हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल ‘प्रचण्ड’ ले तत्कालै सरकारबाट राजीनामा नदिने भएका छन् । देशको पछिल्लो परिवर्तित राजनीतिक घटनाक्रमका विषयमा छलफल गर्न बसेको नेकपा माओवादी केन्द्र पदाधिकारी बैठकले प्रधानमन्त्रीले तत्काल राजीनामा नदिने निर्णय गरेको हो ।

नेकपा माओवादी केन्द्रका सचिव देवेन्द्र पौडेलले प्रधानमन्त्रीले तत्काल राजीनामा नदिने विश्वासको मतका लागि तयार रहने जानकारी दिए ।
‘प्रधानमन्त्रीले राजीनामा नदिने विश्वासको मतका लागि तयारी रहने । रातारातको सहमति सहज र स्वभाविक छैन । कसरी भयो किन भयो,’ उनले भने, ‘प्रधानमन्त्रीसँग पूर्वप्रधानमन्त्री तथा अध्यक्ष ओलीले चारघण्टा कुरा गर्नुभयो । घटना जस्तााको तस्तै भनिदिएको भए हुन्थ्यो ।’

सहमति हो भने जस्ताको तस्तै भन्नुस् भनेर प्रधानमन्त्रीले भनिरहनु भयो । केही भएको छैन हामी मिलेर जाने हो भन्नु भयो ।’
मिलेर जाने भनेर भनिरहेका बेला राति जुन सहमति भयो, त्यो एकातिर एउटा कुरा र अर्कोतिर अर्का कुरा भएको हो भनेर सहजै अनुमान गर्न सकिन्छ सचिव पौडेलले भने ।

बैठकमा प्रधामन्त्रीले संसद फेस गरेर अगाडि बढ्ने निर्णय भएको पनि उनले जानकारी दिए । ‘प्रधानमन्त्रीले संसद फेस गर्ने भन्नु भएको छ हामीले पनि विश्वासको मतका लागि तयारी रहने र अन्य दलहरुसँग पनि छलफल गरेर अगाडि बढ्ने कुरा भएको छ ।’ उनले भने ।

एकातिर एउटा सहमति र अर्कोतिर राष्ट्रिय सहमतिको सरकार बनाउ भनेर भन्नु दुई पार्टीको षडयन्त्र भएको पनि सचिव पौडेलले बताए ।
उनले स्थायित्वको खोजी गर्ने नाममा देशलाई अस्थिरतातिर लैजान नहुने समेत बताए ।