हामी सबैकाे संसारन्यूज

काठमाडौँ । प्रधानमन्त्री पुष्पकमल दाहाल प्रचण्डले काँग्रेस र एमालेले मुलुकलाई ०४७ कै अवस्थामा धकेल्ने प्रयास गरेको गरेको बताएका छन् । उनले मुलुकलाई पश्चगमनतर्फ धकेल्ने डरलाग्दो षड्यन्त्र काँग्रेस–एमालेले गरे पनि त्यसलाई सशक्त प्रतिवाद गर्ने बताए ।

मङ्गलवार प्रधानमन्त्री निवास बालुवाटारमा बसेको माओवादी केन्द्रको पदाधिकारी बैठकमा प्रचण्डले संविधानलाई नै डिरेल गर्ने गरी काँग्रेस–एमालेले कोसिस गरेको बताए ।

‘भ्रष्टाचारको फाइल खोलेपछि काँग्रेस–एमालेमा त्रास देखियो । जनयुद्धले ल्याएका उपलब्धि, सङ्घीयता, समावेशी सहभागिता, संविधान उल्ट्याएर मुलुकलाई पुरानै अवस्थामा धकेल्ने षड्यन्त्र भइरहेको छ ।’ प्रचण्डको भनाइ उद्धृत गर्दै एक नेताले भने, ‘पश्चगमनको सशक्त प्रतिवाद गर्नुपर्छ ।’

बैठकमा प्रचण्डले ओलीसँगको भेटमा राजीनामा नदिने बरु आफूले संसद्मा विश्वासको मत फेस गर्ने ती नेताले बताए । सोमबार राति काँग्रेस र एमाले मिलेर नयाँ सत्ता समीकरण बनाएपछि प्रचण्डले पदाधिकारीको आकस्मिक बैठक बोलाएका थिए ।