हामी सबैकाे संसारन्यूज

काठमाडौँ । नेकपा (एकीकृत समाजवादी)ले नेपाली काँग्रेस र नेकपा एमालेबिचको सत्ता सहयात्रा तानासाही प्रवृत्ति भएको बताएको छ । पार्टीका प्रचार विभाग प्रमुख उपमहासचिव जगन्नाथ खतिवडाले संसद्का ठुला दुई दल मिलेर सरकार बनाउनु बहुदलीय राजनीतिको अपचलन संस्कृति भएको बताए ।

महाधिवेशन स्थल कमलादीमा नेता खतिवडाले काँग्रेस–एमालेको सत्ता समीकरण मुलुकलाई अस्थिरताको चक्रव्यूहमा फसाउने कामका लागि मात्र बन्न लागेको आरोप लगाए ।

उनले सत्ता परिवर्तनलाई चरम अवसरवादको संज्ञा दिँदै खतिवडाले भने, ‘नेपाली काँग्रेस र एमाले मिलेर सत्ता चलाउने कुरा नमिल्दो कुरा हो । यो लोकतन्त्रका निम्ति खतरा हो ।’  उनले सत्ता सम्झौतालाई लिएर संविधानको मर्म विपरीत संविधान संशोधन गर्छौँ भन्ने कुरा अमुक दललाई मान्ने नहुने बताए ।