हामी सबैकाे संसारन्यूज

काठमाडौँ । काठमाडौँ महानगरपालिका-१६ नयाँ बजारस्थित कुमारी टोलको गेट अगाडि सोह्रखुट्टे-बालाजु सडकमा खाल्डो परेको छ । बुधवार बिहान करिब ६ बजे ढल फुटेर ११ फिट गहिरो खाल्डो पर्दा आवागमन प्रभावित भएको छ ।

सडकमा क्षति पुगेपछि सवारीसाधन एकतर्फी आलोपालो सञ्चालनमा छ । उपत्यका ट्राफिक प्रहरी कार्यालयका अनुसार यातायातको चाप बढी हुँदा केही बेर सवारी चालकहरू जाममा बस्नुपर्ने अवस्था छ ।

उक्त खाल्डोमा बा ५० प ३८२ नम्बरको मोटरसाइकल खसेको थियो । मोरङ घर भई काठमाडौँको चाबहिल बस्दै आएका पठाओ चालक विकास शाक्यले चलाएको मोटरसाइकल खाल्डोमा खसेर डुबेको थियो । शाक्य सकुशल छन् ।

मोटरसाइकललाई काठमाडौँ महानगरपालिकाको क्रेन तानेर बाइक बाहिर निकालेको थियो । महानगरपालिकाका कर्मचारी, नगर प्रहरी, ट्राफिक प्रहरी, नेपाल प्रहरीको टोली खटिएको छ । खाल्डो मर्मत गर्ने तयारी छ ।