हामी सबैकाे संसारन्यूज

काठमाडौँ । नेपाली काँग्रेसले प्रधानमन्त्री पुष्पकमल दाहाल प्रचण्डलाई पदबाट राजीनामा दिएर मार्ग प्रशस्त गर्न आग्रह गरेको छ । कार्य सम्पादन समितिको बैठकबाट काँग्रेसले प्रचण्डलाई यस्तो आग्रह गरेको हो ।

काँग्रेस र एमालेले असार १७ गते प्रचण्डलाई हटाएर नयाँ सरकार बनाउने समझदारी गरेका थिए । त्यति बेलै काँग्रेस सभापति शेरबहादुर देउवा र एमाले अध्यक्ष केपी शर्मा ओलीबिच आलोपालो सरकारको नेतृत्व गर्ने समझदारी भएको अनौपचारिक रूपमा सार्वजनिक भएको थियो ।

यसै गरी नेपाली काँग्रेसको कार्य सम्पादन समितिको बैठकले नेकपा एमाले र काङ्ग्रेसबिच सत्ता सहकार्य गर्ने समझदारीलाई अनुमोदन गरेको छ ।

आज पार्टी सभापति शेरबहादुर देउवाको निवास बुढानीलकण्ठमा बसेको कार्यसम्पादन समितिको बैठकले एमालेसँगको समझदारीलाई अनुमोदन गरेको हो ।

बैठकले पहिलो चरणमा सरकारको नेतृत्व नेकपा एमालेका अध्यक्ष केपी शर्मा ओलीले गर्ने र दोस्रो चरणमा निर्वाचन सम्पन्न नभएसम्म काँग्रेस सभापति शेरबहादुर देउवाले सरकारको नेतृत्व गर्ने समझदारीलाई अनुमोदन गरेको छ ।