Sansar News
काठमाडौँ । नेकपा एमालेले नेताहरूलाई नयाँ जिम्मेवारी दिने तयारी गरेको छ । गत वर्ष असारदेखि नेताहरूलाई फरक भूगोल र क्षेत्रको जिम्मेवारी दिइएको थियो । उक्त जिम्मेवारीमा रहेर एक वर्षसम्म काम गरेका नेताहरूलाई अब नयाँ जिम्मेवारी दिइनेछ ।
बुधवार बसेको सचिवालय बैठकले नयाँ जिम्मेवारीको आधार निर्माण गर्ने काम गरेको छ । ‘एक व्यक्ति, एक जिम्मेवारी नीति अनुसार अब नेताहरूलाई दोहोरो जिम्मेवारी नदिने एमालेमा निर्णय भएको छ । तर पार्टी अध्यक्ष केपी शर्मा ओलीलाई भने मापदण्ड लागू नहुने एक नेताले बताए ।
ती नेताले भने, ‘अहिले ओलीले पार्टी अध्यक्ष र संसदीय दलको नेता छन् । नेपाली काँग्रेसको समर्थनमा प्रधानमन्त्री हुने सहमति भएको छ । तसर्थ मुलुक, पार्टी र संसदीय मोर्चाको नेतृत्व ओलीले एकसाथ गर्नेछन् ।
‘एक व्यक्ति, एक जिम्मेवारी नीति पार्टी अध्यक्षलाई लागू हुँदैन’, ती नेताले भने, ‘अध्यक्ष बाहेक कसैले पनि दोहोरो जिम्मेवारी पाउने छैनन् ।’
वि.सं.२०८१ असार २६ बुधवार १६:२२ मा प्रकाशित
