काठमाडौँ । नेपालीमा एउटा भनाई छ, ‘किन रोइस् मङ्गले आफ्नै ढङ्गले’ । हाल यो भनाई उपसभामुख इन्दिरा रानासँग ठ्याक्के मेल खान्छ । उपसभामुख इन्दिरा राना आफैले १७ महिनाअघि अमेरिकी दूतावासलाई लेखेको पत्रका कारण रुनु न हाँस्नुको स्थितिमा पुगेकी छन् ।
उनले पार्टी र संसद् सचिवालयसँग सम्बन्धित नभएका व्यक्तिहरूलाई भिसाको लागि अन्तर्वार्ताको मिति नजिक पारिदिन दूतावासलाई पत्र लेखेकी थिइन् । पत्र सार्वजनिक भएपछि पार्टी भित्र, संसद् र सामाजिक सञ्जालमा उपसभामुख रानाको आलोचना हुन थालेको छ । सर्वत्र आलोचना हुने र राजीनामा समेत माग्न थालिएपछि उनी अहिले तनावमा छन् ।
युएन वुमनको सीएसडब्लू ६७ (मार्च ६ देखि १७) मा सहभागी हुन उपसभामुख राना २०७९ फागुनमा अमेरिका गएकी थिइन् । उनले आफ्नै लेटर हेड प्रयोग गरेको पत्रमार्फत आफ्नो टोलीको सदस्य भन्दै पाँच जनाको अन्तर्वार्ताको समय नजिक सारिदिन काठमाडौँमा रहेको अमेरिकी दूतावाससँग आग्रह गरेकी थिइन् । विभिन्न सञ्चार माध्यमहरूमा उक्त पत्र सार्वजनिक भएपछि उनी विवादमा तानिएकी छन् ।
उपसभामुख आफूसहित उपेन्द्र गौतम, सुस्मा लामा, राजेश लामा तामाङ, सुजन घर्ती मगर र धनबहादुर गुरुङका लागि भिसा अन्तर्वार्ताको समय तत्काल उपलब्ध गराइदिन दूतावासलाई पत्र लेखेकी थिइन् ।
उनले आफू बाहेक पाँचको भूमिका र विवरण पत्रमा खुलाएकी थिइनन् । पत्रमा नाम उल्लेखित मानिसहरूले अन्तर्वार्ताको डेट पाउन सकेनन् । तर, उपसभामुख राना भने एक्लै अमेरिका गएर फर्केकी थिइन् ।
पत्रप्रति सभामुखको ध्यानाकर्षण
उपसभामुख इन्दिरा रानाले अमेरिकी दूतावासलाई लेखेको पत्र सार्वजनिक भएपछि सभामुख देवराज घिमिरेको ध्यानाकर्षण भएको छ । सभामुख घिमिरेले बिहीबार संसद्लाई प्रभावकारी बनाउने विषय भएकाले प्रमुख सचेतकहरूसँग छलफल गरेका छन् ।
सभामुखको सचिवालयका अनुसार सभामुखले यो विषयलाई गम्भीरताका पूर्वक हेरेको र छानबिन हुनुपर्नेमा जोड दिएका छन् । सभामुख घिमिरेले उपसभामुख रानासँग पत्रको बारेमा प्रश्न गरेका थिए । जवाफमा रानाले आफूले पत्र नलखेको दाबी गरेकी थिइन् ।
पछि हस्ताक्षर दुरुपयोग भएको हो भने किर्तेमा जान र पत्र गलत भए सार्वजनिक गर्ने विरुद्ध कारबाहीमा जान दबाब बढेपछि उपसभामुखले पत्र लेखेको विषय स्वीकार गरेकी छन् ।
रास्वपाले गर्यो सोधपुछ
विवादमा तानिएकी उपसभामुख इन्दिरा रानासँग राष्ट्रिय स्वतन्त्र पाटीले दूतावासलाई लेखेको पत्रका सन्दर्भमा सोधपुछ गरेको छ । पार्टीका उपसभापति डोलप्रसाद अर्यालले उपसभामुख रानासँग सोधपुछ गरेका हुन् ।
उनले बाहिर आएका विषयवस्तुबारे पार्टीले अध्ययन गरिरहेको बताए । भिसाका लागि नभएर अन्तर्वार्ताको डेटका लागि मात्र सिफारिस गरिएको हुँदा यो त्यति ठुलो विषय नभएको उपसभापति अर्यालको भनाइ छ । उनले उपसभामुखसँग सोधपुछ र छलफल जारी राखेको बताए ।
नियत बस गरेको होइन : उपसभामुख
अमेरिकी दूतावासलाई पत्र लेखेको स्वीकार गर्दै उपसभामुख रानाले गलत नियतले पत्र नलेखेको बताएकी छन् । यो कार्यमा कुनै आर्थिक लेनदेन समेत नभएको उनको तर्क छ ।
उपसभामुख रानाले एक वर्ष पछाडि यो विषय उठ्नुमा आश्चर्यमा परेको बताएकी छन् । उनले रास्वपा झापाका नेता उपेन्द्र गौतमले भने अनुसार भिसाका लागि नभएर अन्तरवार्ताको मितिका सन्दर्भमा पत्र लेखेको बताइन् ।
रानाले उपसभामुखको भूमिकामा राम्रै काम गरेको भन्दै राजनीतिक सङ्कटको बेला डेढ वर्ष अघिको विषय उठाइनुले आफू आश्चर्यमा परेको बताइन् ।
वि.सं.२०८१ साउन ४ शुक्रवार १६:०५ मा प्रकाशित
