हामी सबैकाे संसारन्यूज

काठमाडौं । रोमानियामा रेलको ठक्करबाट मृत्यु भएका दुई नेपाली युवाको पहिचान खुलेको छ। दुर्घटनामा सिन्धुपाल्चोकको त्रिपुरासुन्दरी गाउँपालिका–५, पाल्वा निवासी ३६ वर्षीय शान्तकुमार श्रेष्ठ र चितवनको भरतपुर महानगरपालिका–२०, बागबजार निवासी २५ वर्षीय निश्चल तामाङको घटनास्थलमै मृत्यु भएको रोमानियाको बाकाउ प्रहरीले जनाएको छ।

पूर्वअवैतनिक नेपाली वाणिज्यदूत नवराज पोखरेलका अनुसार घटनाबारे नेपालमा रहेका मृतकका परिवारलाई जानकारी गराइसकिएको छ। साथै, मृतकहरूको शव नेपाल पठाउन आवश्यक कानुनी तथा प्रशासनिक प्रक्रिया अघि बढाउन सम्बन्धित निकायसँग समन्वय भइरहेको उनले जानकारी दिए।

दुर्घटना रोमानियाको राजधानी बुखारेस्टबाट करिब ३०८ किलोमिटर टाढा पर्ने बाकाउ सहरको चिमिई रेल–सडक खण्डमा गत अगस्ट २ (आइतबार) स्थानीय समयअनुसार बिहान ३:२१ बजे भएको थियो।

प्रहरीको प्रारम्भिक जानकारीअनुसार रेलमार्ग आसपासको क्षेत्र अँध्यारो र झाडीले ढाकिएको कारण उनीहरुले रेलबारे थाहा पाएनन् जसका कारण तीव्र गतिमा आएको रेलले उनीहरुलार्ई ठक्कर दिँदा दुवैको घटनास्थलमै मृत्यु भएको बताइएको छ।

दुर्घटनाका बेला उनीहरूसँग रहेका अन्य दुई नेपाली कामदार भने रेलको हावाको चापले छेउको झाडीमा फालिँदा घाइते भएका छन्। उनीहरूको उपचार भइरहेको जनाइएको छ। दुर्घटनाको वास्तविक कारणबारे रोमानियाली प्रहरीले थप अनुसन्धान गरिरहेको छ।

रोजगारीका लागि रोमानिया पुगेका शान्तकुमार श्रेष्ठ २७ मे २०२३ मा त्यहाँ पुगेका थिए भने निश्चल तामाङ करिब चार वर्षअघि रोजगारीका लागि रोमानिया गएका थिए। उनीहरू सेम डे सोलुसन कम्पनीमार्फत टीआरके एजेन्सीको सहकार्यमा कुरिअर वेयरहाउसमा कार्यरत रहेका थिए।