हामी सबैकाे संसारन्यूज

काठमाडौं । कुवेतस्थित नेपाली राजदूतावासले मध्यपूर्व क्षेत्रमा बढ्दो सुरक्षा चुनौतीलाई ध्यानमा राख्दै त्यहाँ रहेका नेपाली नागरिकलाई संयम अपनाउन र सुरक्षा सतर्कता बढाउन आग्रह गरेको छ।

कुवेतको उत्तरी क्षेत्रमा भएको ड्रोन आक्रमणमा परी तेह्रथुमका सोमकुमार तामाङको निधन भएपछि राजदूतावासले विज्ञप्ति जारी गर्दै सबै नेपालीलाई सतर्क रहन अनुरोध गरेको हो। आक्रमणमा सवारी चालकका रूपमा कार्यरत तामाङको ज्यान गएको पुष्टि गर्दै राजदूतावासले घटनाप्रति गहिरो दुःख व्यक्त गरेको छ।

राजदूतावासले स्वर्गीय तामाङप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेको छ। साथै, मृतकको पार्थिव शरीर यथाशीघ्र नेपाल पठाउन सम्बन्धित निकायसँग आवश्यक समन्वय र सहजीकरण भइरहेको जनाएको छ।

राजदूतावासले मध्यपूर्वमा जारी अस्थिरता र युद्धको अवस्था लम्बिन सक्ने संकेत देखिएकाले त्यहाँ कार्यरत नेपाली श्रमिक, व्यवसायी तथा सम्पूर्ण नेपाली समुदायलाई स्थानीय सरकारले जारी गरेका सुरक्षा निर्देशन र मापदण्डको पूर्ण पालना गर्न, सुरक्षित स्थानमा रहन तथा अनावश्यक आवतजावत नगर्न आग्रह गरेको छ।

साथै, आपसी सहयोग, सद्भाव, सहानुभूति र एकताको भावना कायम राख्दै सम्भावित चुनौतीहरूको सामूहिक रूपमा सामना गर्न सबै नेपालीलाई अपिल गरिएको छ।