हामी सबैकाे संसारन्यूज

काठमाडौं । नेपालस्थित चिनियाँ दूतावासले नेपालसँगको चिरस्थायी मित्रतायुक्त रणनीतिक सहकार्य साझेदारीलाई अझ सुदृढ बनाउँदै दुवै देशबीचको परम्परागत मित्रतालाई नयाँ उचाइमा पुर्‍याउन चीन प्रतिबद्ध रहेको जनाएको छ।

नेपाल–चीन कूटनीतिक सम्बन्ध स्थापना भएको ७१औँ वर्षगाँठका अवसरमा जारी शुभकामना सन्देशमा दूतावासले चीनले नेपालसँगको परम्परागत मैत्री सम्बन्धलाई अझ सुदृढ बनाउँदै विकास र समृद्धिका लागि चिरस्थायी मित्रतायुक्त रणनीतिक सहकार्य साझेदारीलाई थप अघि बढाउन तत्पर रहेको जनाएको छ।

सन्देशमा दुवै देशबीचको सहकार्यलाई थप विस्तार गर्दै त्यसबाट दुई देशका जनताले अझ बढी लाभ लिन सक्ने वातावरण निर्माणमा चीनले निरन्तर सहयोग गर्ने प्रतिबद्धता व्यक्त गरेको छ।

दूतावासले विगत ७१ वर्षमा नेपाल–चीन सम्बन्ध दिगो मित्रता, पारस्परिक सम्मान र पारस्परिक हितमा आधारित सहकार्यका माध्यमबाट निरन्तर सुदृढ हुँदै आएको उल्लेख गरेको छ।

नेपाल र चीनबीच कूटनीतिक सम्बन्ध सन् १९५५ (वि.सं. २०१२) मा स्थापना भएको थियो। त्यसयता दुई देशबीच राजनीतिक, आर्थिक, सांस्कृतिक तथा विकास साझेदारीका विभिन्न क्षेत्रमा सहकार्य निरन्तर विस्तार हुँदै आएको छ।