काठमाडौं । सौर्य एयरको जहाज दुर्घटनामा मृत्यु भएका १८ जनाको आज नै पोस्टमार्टम सुरु हुने भएको छ । त्रिभुवन विश्वविद्यालय शिक्षण अस्पताल स्रोतका अनुसार मृतकका आफन्त र सौर्य एयरलाइन्सका प्रतिनिधि आएपछि पोस्टमार्टम सुरु गर्ने तयारी छ । स्रोतले सबै शवको पोस्टमार्टम गरेर तीन दिनपछि मात्र आफन्तलाई शव जिम्मा लगाउन सकिने बताएको छ ।
बुधबार बिहान ११ बजेर ११ मिनेट जाँदा त्रिभुवन विमानस्थलबाट पोखरा जान लागेको सौर्य एयरको जहाज उड्नेवित्तिकै आगलागी हुँदा १८ जनाको मृत्यु भएको छ । पाइलट मनिष शाक्य घाइते भएका छन् ।
मृतकको शव पोस्टमार्टमका लागि त्रिवि शिक्षण अस्पताल लगिएको छ । पाइलट शाक्यको सिनामंगलस्थित केएमसी शिक्षण अस्पतालमा उपचार भइरहेको छ । जहाज मर्मतका लागि पोखरा लैजान लागिएको थियो । जहाजमा कर्मचारीसहित १८ जना यात्रु र पाइलट मनिष शाक्य गरी १९ सवार थिए ।
वि.सं.२०८१ साउन ९ बुधवार १४:३५ मा प्रकाशित
