हामी सबैकाे संसारन्यूज

नयाँ दिल्ली । नेपाल उद्योग वाणिज्य महासङ्घकी पूर्व अध्यक्ष भवानी राणाले महिला उद्यमीहरूको क्षमता अभिवृद्धि र नीति वकालतको लागि बिमस्टेक सिसिआई गठन गर्नुपर्ने बताएकी छन् ।

भारतको नयाँ दिल्लीमा बुधवार आयोजित बिमस्टेक बिजनेस समिट २०२४ मा आर्थिक सशक्तीकरणको समावेशी सम्बन्धमा विषयक छलफलमा बोल्दै पूर्व अध्यक्ष राणाले यस्तो बताएकी हुन । उनले निरन्तर आर्थिक गतिविधिमा समावेशीकरणमा उब्जिएका नयाँ चुनौतीहरूलाई सम्बोधन गर्न सरकार र निजी क्षेत्रले महिलाको वित्तमा पहुँच, सीप विकास तालिम र शिक्षा, मार्गदर्शन अवसर, सहजीकरण गर्न मिलेर काम गर्नुपर्नेमा जोड दिइन् ।

राणाले सीसीआईले नेपाल र अन्य सदस्य राष्ट्रका महिला उद्यमीहरूलाई उनीहरूको व्यावसायिक सीप अभिवृद्धि, बजार बुझ्न कार्यशाला, सेमिनार र तालिमको व्यवस्था गरिनुपर्ने उल्लेख गरिन् । पूर्व अध्यक्षसमेत रहेकी राणाले आर्थिक समावेशीकरणका धेरै फाइदाहरू रहेको भन्दै स्थानीय र राष्ट्रिय अर्थतन्त्रलाई थप गतिशील र कार्यस्थललाई थप नवीन बनाउनुपर्ने धारणा राखिन । उनले लैङ्गिक समानता कायम राख्दा अर्को वर्षको अन्त्यसम्ममा विश्वको आर्थिक वृद्धिमा १२ ट्रिलियन अमेरिकी डलर थपिने बताइन ।

उनले सरकार र निजी क्षेत्रका व्यवसायीक निकायहरूलाई महिलाको आर्थिक सहभागितामा रहेका अवरोधहरू हटाउन पहल गर्न सबैलाई आह्वान्समेत गरिन । राणाले बिमस्टेक चेम्बर अफ कमर्स एन्ड इन्डस्ट्रीमा महत्त्वपूर्ण भूमिका खेल्ने नेपाली उद्यमीहरूलाई सम्बोधन गर्न नीतिगत हस्तक्षेप आवश्यक रहेको बताइन् ।

बिमस्टेकमा बिमस्टेक सिसिआई गठनले व्यापार र लगानी अवसर वृद्धि गर्न काम गर्नु पर्नेमा राणाको विशेष जोड छ । उनले बिमस्टेक सीसीआईले आयोजना गर्ने व्यापार मेला, व्यापार मञ्च र लगानी सम्मेलनमा सहभागी भएर नेपाली उद्यमीहरूले आफ्ना उत्पादन र सेवाहरू प्रदर्शन गर्न, विदेशी लगानी आकर्षित गर्न र नयाँ बजार खोज्न सकिने पनि उल्लेख गरेकी छन् ।

राणाले नेपाली महिला उद्यमीहरूको संलग्नता विशेष गरी उल्लेखनीय रहेको बताउँदै बिमस्टेकले उनीहरूलाई एकताबद्ध गर्न, उत्कृष्ट प्रशिक्षार्थीहरूको अनुभव आदान प्रदान गर्न, र व्यवसायमा महिलाहरूका लागि उपयुक्त स्रोत तथा प्रशिक्षण कार्यक्रमहरूमा पहुँच पुर्‍याउने प्लेटफर्म निर्माण गर्ने बताइन ।

बिमस्टेक सिसिआईमा नेपाली उद्यमीहरूको सक्रिय सहभागिताले क्षेत्रीय आर्थिक एकीकरणलाई बढवा दिन, व्यापार अवसरहरू बढाउन र नेपाल र बृहत्तर बिमस्टेक क्षेत्रको दिगो विकासलाई प्रवर्द्धन गर्न मद्दत गर्ने उनको भनाइ छ ।