काठमाडौँ । शिक्षामन्त्री विद्या भट्टराईले बुधवार टेलिफोनमार्फत धम्की आएको भन्दै सुरक्षा माग गरेपछि त्रिभुवन विश्वविद्यालयमा समाजशास्त्र विभागको विभागीय प्रमुख नियुक्तको लफडा छताछुल्ल भएको छ ।
त्रिभुवन विश्व विद्यालयमा समाजशास्त्र केन्द्रीय विभागको विभागीय प्रमुख युवराज लुइँटेलको कार्यकाल गत शुक्रवार नै सकिएको थियो । विभागीय प्रमुखको कार्यकाल सकिएपछि मानविकी तथा समाजशास्त्र सङ्कायले नयाँ डिनको नियुक्तिको लागि सिफारिस गरेको थियो । तर असन्तुष्ट पक्षले सो सङ्कायकी डिन कुसुम शाक्यले कार्यविधि मिचेर विभागीय प्रमुखको नाम सिफारिस गरेकोभन्दै नियुक्तिको निर्णय हुन नसकेको त्रिविवि स्रोतले जानकारी दिएको छ ।
त्रिविविको कार्यविधिमा ज्येष्ठता र वरिष्ठताका आधारमा विभागीय प्रमुख नियुक्त हुने व्यवस्था छ । नयाँ नियुक्ति गर्ने कार्यविधि अनुसार छनौट समितिले विभागीय प्रमुखको पहिलो नम्बरमा सह–प्राध्यापक पासाङ शेर्पा र दोस्रो नम्बरमा सह–प्राध्यापक टिकाराम गौतमलाई सिफारिस गरेको थियो । तर, डिन शाक्यको रोजाइमा दोस्रो नम्बरका गौतम परेपछि विवाद सुरु भएको थियो । वरिष्ठताको आधारमा पहिलो नम्बरमा रहेका शेर्पा एमाले निकट र दोस्रो नम्बरमा रहेका गौतम काँग्रेस निकट मानिन्छन् । डिन शाक्यले पासाङ छ महिना अगाडि मात्र त्रिचन्द्र क्याम्पसबाट सरुवा भएर आएको भन्दै गौतमलाई सिफारिस गरेको स्रोतले जानकारी दिएको छ । गौतम लामो समयदेखि त्रिविको केन्द्रीय क्याम्पसमा कार्यरत छन् ।
तर, कार्यकारी परिषद्ले छनौट समितिबाट सिफारिस भएका गौतमलाई विभागीय प्रमुख बनाउन अस्वीकार गरेका कारण धम्की आउन थालेको त्रिविवि स्रोतले बताएको छ ।
यता शेर्पा पक्षधरले विभागीय प्रमुखको सिफारिस नियमसङ्गत नभएको आरोप लगाएका छन् । उनीहरूले एक नम्बरमा भएका शेर्पालाई विभागीय प्रमुख नियुक्त नगरेर डिनले अन्याय गरेको बताएका छन् । उनीहरू काँग्रेस निकट गौतमलाई सिफारिस गरेकोमा शिक्षा मन्त्री विद्या भट्टराईसँग समेत आक्रोशित छन् ।
त्रिभुवन विश्व विद्यालयका एक प्राध्यापकका अनुसार गौतमलाई विभागीय प्रमुखमा नियुक्ति नगरे त्यसको परिणाम राम्रो नहुने भन्दै शेर्पा समूहले धम्की दिने गरेको बताएका छन् । त्यो समूहले पदाधिकारीले एकमतका साथ गौतमलाई विभागीय प्रमुख बनाउने सिफारिस गरेकाले कार्यकारी परिषद्लेले अड्को थाप्न नहुनमा जोड दिएका छन् । स्मरण रहोस् निवर्तमान प्रचण्ड नेतृत्वको सरकारले दोस्रो नम्बरमा रहेका केशरजंग बराललाई त्रिविविको उपकुलपति नियुक्त गरेको थियो ।
यता गौतमलाई केहीले विद्यार्थीका प्रिय पात्र भनेका छन् भने केहीले विद्यार्थीलाई उचालेर त्रिविविलाई अनिर्णयको बन्दी बनाउन खाजेको आरोप लगाएका छन् । शिक्षा मन्त्रीले आफ्नो चाहानामा गौतमलाई विभागीय प्रमुख बनाउन खोजेको एमाले निकटहरुको भनाइ छ ।
वर्तमान शिक्षा मन्त्री भट्टराई एमाले नेतृ हुन् । वर्तमान सांसद हुनुअघि उनी त्रिविविमा अध्यापन गराउँथिन भने तत्कालीन पर्यटन मन्त्री रवीन्द्र अधिकारीको हेलिकप्टर दुर्घटनामा परेर निधन भएपछि उनी प्राध्यापन पेसा छोडेर राजनीतिमा आएकी हुन् ।
असुरक्षित बन्दै त्रिविवि
त्रिविविमा धम्की र आक्रमण नयाँ कुरो होइन । केही समय अगाडि प्राध्यापक प्रेम चलाउनेलाई त्रिविवि परिसरमै आक्रमण भएको थियो । नेविसंघ सम्बद्ध केही व्यक्तिहरूले चलाउनेलाई आक्रमण गरेर शक्त घाइते बनाएका थिए । ती आक्रमणकारीलाई नेपाली काँग्रेसले संरक्षण गरेर उन्मुक्तिको प्रयास गरेको थियो । तर, अदालतको आदेशले ती आक्रमणकारी जेलमा छन् ।
त्रिभुवन विश्वविद्यालयको आङ्गिक क्याम्पस ठमेलमा रहेको सरस्वती क्याम्पसमा परीक्षा हलमा गैर परीक्षार्थी छिरेर अध्यापकमाथि हातपात गरेका थिए । अध्यापकमाथि हातपात भएपछि सो क्याम्पसको परीक्षा केन्द्र रद्द गरिएको छ । सत्तारूढ एमालेनिकट अनेरास्ववियुका केन्द्रीय सदस्य किङ्गा शेर्पाले परीक्षा निरीक्षक रहेका अध्यापक भीम सुवेदीलाई हातपात गरेको थिए ।
त्रिविवि अन्तर्गतका क्याम्पसहरूमा राजनीतिको आबरणमा सदिऔदेखि कुटपिट र धम्कीका घटनाहरू हुने गरेको सार्वजनिक भइरहँदा राजनीतिक नेतृत्व भने कानमा तेल हालेर बसेको देखिन्छ ।
वि.सं.२०८१ भदौ ५ बुधवार १६:३९ मा प्रकाशित
