हामी सबैकाे संसारन्यूज

काठमाडौँ । युएईमा मृत्यु भएका २४ वर्षीय कृष्णप्रसाद पाण्डेको शव ल्याउन आर्थिक अभावका कारण समस्या भएको छ । अर्घाखाँचीको छत्रदेव गाउँपालिका-७, घर भएका पाण्डे दुई वर्षअघि भिजिट भिसामा युएई गएका थिए । उनी गत भदौ ९ गते आबुधाबी सहरमा मृत फेला परेका थिए ।

युएईको प्रहरीले सडक छेउ फेला परेको उनको शव आबुधाबीको अस्पतालमा बुझाएको थियो । उनको मृत्युको कारण भने खुलेको छैन ।

अहिले विदेशबाट शव फिर्ता ल्याउन एक लाख रुपैयाँ आवश्यक परेको मृतकका दाइ नाता पर्ने शशिधर पाण्डे बताए । तर, परिवारको आर्थिक अवस्था कमजोर भएकाले पैसा जुटाउन समस्या भएको उनको भनाइ छ । मृतक पाण्डेका बुबा–आमा र श्रीमती भारतमा मजदुरी गरेर बसिरहेका छन् ।

मृतकका दाइ शशिधरका अनुसार सुरुमा शव फिर्ता ल्याउन दुई लाख हाराहारी लाग्ने भनिएको थियो । तर कृष्ण कार्यरत रेष्टुरेष्टले एक लाख रुपैयाँ सहयोग गरिदिने भएपछि बाँकी पैसा परिवारले व्यहोर्नुपर्ने भएको उनले बताए ।