हामी सबैकाे संसारन्यूज

काठमाडौँ । मोरङमा दुई बालिका मृत अवस्थामा फेला परेका छन् । उनीहरुको हत्या भएको आशंका प्रहरीले गरेको छ ।

सुन्दरहरैँचा नगरपालिका–७ निवासी अर्जुन कार्की र अस्मिता पौडेल (कार्की)का एक वर्षीया छोरी अर्पणा र तीन वर्षीया आयिका घर नजिकै केराघारीभित्र शनिवार मृत फेला परेका हुन् ।

जिल्ला प्रहरी कार्यालय मोरङका डीएसपी ज्ञानेन्द्रबहादुर बस्नेतले आमा २९ वर्षीया अम्मिता बेपत्ता रबेको बताए । मृत भेटिएका दुई बालिकाका बुवा अर्जुनले पति–पत्नीबीच झगडा भएपछि शुक्रबार राति करिब साढे ८ बजेतिर अम्मिता दुई छोरीलाई लिएर घरबाट निस्किएको बयान दिएका छन् ।

घर नजिकै स्थानीय नारायण न्यौपानेको केराको बगैँचाभित्र दुई बालिकाको शव फेला परेपछि स्थानीयले प्रहरीलाई खबर गरेका थिए । धनकुटाको पाख्रिबास नगरपालिका–४ डिकुरे घर भएका अर्जुन पत्नी र चार छोरीसहित मोरङको सुन्दरहरैँचा–७ मालती टोलमा सीता रेग्मीको घरमा बस्दै आएका थिए ।

बालिकाहरुको शव फेला परेको स्थान नजिकै कीटनाशक औषधिको बट्टा फेला परेको डीएसपी बस्नेतले बताए । बालिकाको शवमा कुनै बाहिरी चोट पटक छैन । छोरीहरुको शव फेला परे पनि अस्मिता कहाँ गइन् केही नखुलेको प्रहरीले जनाएको छ ।