काठमाडौँ । नेकपा एकीकृत समाजवादी पार्टीका उप महासचिव मेटमणि चौधरीले नेपाली भूभाग ‘लिपुलेक कालापानी भारतको हो नि’ भन्ने अभिव्यक्ति दिएपछि विवादमा तानिएका छन् ।
भाद्र २५ गते साँझ प्राइम टेलिभिजनको कार्यक्रम ‘जनता जान्न चाहन्छन्’मा उप महासचिव चौधरीले ‘लिपुलेक कालापानी भारतको हो नि’ भन्ने अभिव्यक्ति दिएका थिए ।
उनको अभिव्यक्तिको सर्वत्र आलोचना भएपछि नेकपा एकीकृत समाजवादी पार्टीका महासचिव घनश्याम भुसालले एक विज्ञप्ति जारी गर्दै स्पष्टीकरण सोधेका छन् ।
विज्ञप्तिमा भनिएको छ, ‘गत भाद्र २५ गते साँझ प्राइम टेलिभिजनको ’जनता जान्न चाहन्छन्’ कार्यक्रममा तपाईँले “लिपुलेक र कालापानीमाथि इन्डियाले आफ्नो दाबी प्रस्तुत गरेको छ । मलाई लाग्छ दाबी पुग्छ उसको, दाबी पुग्छ, भारतले लिन पाउँछ….(कालापानी र लिपुलेक) भारतको हो नि’ भन्नु भएको रहेछ ।’
‘अनेकौँ तथ्यहरूले उक्त भूभाग नेपालको हो भन्ने कुरा स्पष्ट पारेका छन् । हाम्रो पार्टीको समेत दाबीका आधारमा उक्त भूभाग संविधानको अङ्ग बनाइएको कुरा सर्वविदित नै छ । त्यस विपरीत, मुलुकको अखण्डता र सार्वभौमसत्ताका विरुद्ध तपाईँले किन बोल्नु भएको हो ? यसबारे तीन दिन भित्र लिखित रूपमा स्पष्टीकरण दिनु होला ।’ विज्ञप्तिमार्फत जवाफ मागिएको छ ।
वि.सं.२०८१ भदौ २७ बिहीवार २१:३० मा प्रकाशित
