हामी सबैकाे संसारन्यूज

काठमाडौँ । काठमाडौँ स्पाइकर्सले आगामी वात्सल्य एभरेस्ट महिला भलिबल लिग २०२४ का लागि विदेशी खेलाडीका रूपमा अन्तर्राष्ट्रिय ख्यातिप्राप्त भलिबल खेलाडी सेटर एन्ड्रिया त्सभेतानोभालाई अनुबन्ध गरेको छ ।

बुल्गेरियाकी प्रतिष्ठित र अनुभवी भलिबल खेलाडी एन्ड्रिया त्सभेतानोभा काठमाडौँ स्पाइकर्समा सामेल भएकी हुन् । सेटर त्सभेतानोभा फुर्तिलो,जोसिलो र रणनीतिक खेलका लागि प्रख्यात उनले NCAA, NJCA, MECA, NIVC र बुल्गेरियन लीगहरू सहित शीर्षस्तरका लीगहरूमा उत्कृष्ट प्रदर्शन गर्नुका साथै बुल्गेरियन CEV च्याम्पियन्स लिग र FIVB क्लब विश्व च्याम्पियनसिपमा उल्लेखनीय प्रदर्शन मार्फत महत्त्वपूर्ण सफलता हासिल गरेकी छिन् ।

उनले विश्व च्याम्पियनसिप पदक र कन्टिनेन्टल टाइटलसँगै सर्भिस, डिफेन्स, लिडरसिप र खेल भावनाका लागि विभिन्न पुरस्कारहरू प्राप्त गरेकी छिन्। त्सभेतानोभाको प्रभावशाली करियर काठमान्डु स्पाइकर्सको लागि मूल्यवान हुनेछ। काठमाडौँ स्पाइकर्समा आबद्ध भएकी त्सभेतानोभाको उमेर  २४ वर्ष रहनुका साथै  १७८ सेन्टिमिटर उचाइकी छिन् ।

काठमाडौँ स्पाइकर्सका सीओओ सुदिक्षा अधिकारीले भनिन्,“हामीले बलियो र सन्तुलित टोली निर्माण गर्ने प्रतिबद्धता अनुरूप सेटर एन्ड्रिया त्सभेतानोभालाई अनुबन्ध गरेका हौँ । हामीलाई विश्वास छ उनले ल्याउने अन्तर्राष्ट्रिय अनुभव र विजयी मानसिकताले लिगमा हाम्रो प्रदर्शनमा सकारात्मक प्रभाव पार्नेछ । उनको खेल कौशल हाम्रा स्थानीय खेलाडीहरूसँग कसरी मिसिन्छ भनेर हेर्न हामी उत्सुक छौँ ।”

काठमाडौँ स्पाइकर्समा सामेल हुँदाको उत्साह व्यक्त गर्दै एन्ड्रिया त्सभेतानोभाले भनिन्, “यस्तो डाइनामिक र महत्त्वाकाङ्क्षी टिमको हिस्सा हुन पाउँदा मैले सम्मानित अनुभव गरेको छु। भलिबल मेरो लागि खेल मात्र नभई जुनून हो र म आफूले ल्याएको अनुभव प्रयोग गरेर स्पाइकरहरूलाई उच्चस्तरीय प्रतिस्पर्धामा सघाउन उत्सुक छु। मैले एभरेस्ट महिला भलिबल लिगको बारेमा धेरै सुनेको छु र म टिमलाई सफल बनाउन र यहाँका फ्यानहरूसँग जोडिन आतुर छु ।

एभरेस्ट वुमन्स भलिबल लिगमा त्सेस्नोभाको आगमनपछि आफ्नो टोली थप बलियो हुनेमा काठमाडौँ स्पाइकर्स विश्वस्त छ । आफ्नो नयाँ स्टार खेलाडीको साथले बलियो प्रदर्शन गर्न र अविस्मरणीय क्षणहरू सिर्जना गर्नका लागि टिम तत्पर छ ।