काठमाडौँ । नेकपा माओवादी केन्द्रले सरकार विरुद्ध शनिवार काठमाडौँमा गर्न लागेको विरोध प्रदर्शनको तयारी अन्तिम चरणमा पुगेको नेकपा माओवादी केन्द्रका केन्द्रीय सचिव दिननाथ शर्माले जानकारी दिएका छन् ।
उनका अनुसार प्रदर्शनमा काठमाडौँ उपत्यका सहित बाग्मती प्रदेशका विभिन्न नेता, कार्यकर्ता, शुभचिन्तक, सबै जन वर्गीय सङ्गठनहरू सहभागी हुने छन् । प्रदर्शनी मार्गमा हुने विरोध सभालाई माओवादी केन्द्रले ‘खबरदारी सभा’ नाम दिएको छ । माओवादी केन्द्रका गण्डकी प्रदेश इन्चार्ज समेत रहेका शर्माले प्रदर्शन भ्रष्टाचार र बेथितिविरुद्ध केन्द्रित हुने बताए ।
‘खबरदारी सभा सुरु हुनुअघि बिहान साढे ११ बजे भद्रकाली, सुनधारा र काठमाडौँ मल अगाडि कार्यकर्ताहरू भेला हुनेछन् । त्यसपछि जुलुस सुरु हुने छ ।’ उनले भने, ‘प्रदर्शनमा सहभागीहरूले राष्ट्रिय झन्डा, पार्टीको झन्डा, ब्यानर, नारा लेखिएका प्लेकार्ड बोक्ने छन् । जुलुसको बिचमा साउण्डसिस्टम जडित तीन वटा गाडीहरू हुनेछन् । सहभागीहरूले सरकारविरुद्ध नारा लगाउने छन् ।’
सचिव शर्माले जुलुस रत्नपार्क, बागबजार, पुतलीसडक, पद्मोदय मोड हुँदै भृकुटीमण्डपको सडकमा पुगेर सभामा परिणत हुने बताए । सभालाई नेकपा माओवादी केन्द्रका अध्यक्ष पुष्पकमल दाहाल प्रचण्डले सम्बोधन गर्ने कार्यक्रम छ ।
‘सभामा न्यूनतम २० हजार देख ३५ बढीमा ५० हजार जना सहभागी हुने अनुमान छ । तर, ३५ हजार जना अनिवार्य उपस्थित हुनेछन् । उनका अनुसार राष्ट्रिय सभागृह अगाडिको सडकमा मञ्च तयार गरिएको छ ।
वि.सं.२०८१ कात्तिक ९ शुक्रवार ११:४५ मा प्रकाशित
