हामी सबैकाे संसारन्यूज

काठमाडौं । काठमाडौंमा चिनियाँ पर्यटन प्रवर्द्धनका लागि ‘निहाओ चाइना’ कार्यक्रमको आयोजना गरिएको छ । बुधबार चिनियाँ राष्ट्रिय पर्यटन कार्यालय काठमाडौं, एयर चाइना, चाइना साउर्दन एयरलाइन्स र चाइना इस्टर्न एयरलाइन्स काठमाडौंले संयुक्तरुपमा सो कार्यक्रमको आयोजना गरेको हो ।

उक्त कार्यक्रमलाई सम्बोधन गर्दै नेपालस्थित चिनियाँ सांस्कृतिक केन्द्रकी निर्देशक स्याओ च्याङले चिनियाँ पर्यटन प्रवर्द्धनका लागि निहाओ चाइना कार्यक्रममार्फत नेपालका पर्यटन व्यवसायी र पर्यटन क्षेत्रसँग सम्बन्धित व्यक्तिहरूले चिनियाँ पर्यटन प्रवर्द्धन सम्बन्धी नीतिबारे जानकारी हासिल गर्न सहयोग पुग्ने बताइन् । उनले यश कार्यक्रमबाट दुवै देशका पर्यटन व्यवसायीहरुले आ आफ्ना अनुभव साटासाट गर्दै चीन र नेपालको पर्यटनको विकासमा महत्त्वपूर्ण भूमिका खेल्ने विश्वास व्यक्त गरिन् ।

कार्यक्रमलाई एयर चाइना काठमाडौंका व्यवस्थापक चाङ स्वेसङ, चाइना साउर्दन एयरलाइन्स काठमाडौंका निर्देशक याङ वेनफु र चाइना इस्टर्न एयरलाइन्स काठमाडौंका प्रबन्ध निर्देशक चाङ् यीले आ आफ्नो कम्पनीका बारेमा जानकारी दिए । साथै चीनका पर्यटन व्यवसायी कम्पनीहरु पनि चिनियाँ पर्यटनका बारेमा जानकारी दिएका थिए ।

त्यसैगरी, चिनियाँ राष्ट्रिय पर्यटन कार्यालय काठमाडौंका कर्मचारी मोहन सुवालले चीनका विभिन्न पर्यटकीय तथा ऐतिहासिक स्थल र चिनियाँ परिकारका बारेमा जानकारी दिएका थिए ।

कार्यक्रममा गोला प्रथामार्फत तीन जना नेपालीले चीन जानका लागि हवाई टिकट जित्न सफल भएका छन् ।

कार्यक्रममा नेपाल र चीन दुवै देशका विभिन्न पर्यटन व्यवसायी तथा पर्यटन क्षेत्रका प्रतिनिधिहरूको उपस्थिति रहेको थियो ।