हामी सबैकाे संसारन्यूज

अखिल नेपाल महिला संघ(क्रान्तिकारी) काठमाडौँ जिल्ला समन्वय समितिले २९ औँं ऐतिहासिक बेथान वीरता दिवस मनाएको छ ।

अनेमसंघ क्रान्तिकारीको केन्द्रीय अध्यक्ष तथा नेकपा (माओवादी केन्द्र)की स्थायी समिति सदस्य अमृता थापामगरको प्रमुख आतिथ्यतामा सम्पन्न सो कार्यक्रममा माओवादी केन्द्रको केन्द्रीय सदस्य सरिता महर्जन, पार्वती थापामगर, मनु हुमागाई, शुसिला पौडेल र मीना शर्मा तिवारी तथा प्रदेश कमिटी सदस्य जमुना बुढाथोकी, चिजा पण्डित, अनेमसंघ (क्रान्तिकारी) काठमाण्डौ जिल्ला महानगर कमिटीकी अध्यक्ष मुना न्यौपाने, अनेमसंघ क्रान्तिकारीकी प्रदेश सल्लाहकार राधा लुईंटेल लगायतको उपस्थिति रहेको थियो ।

कार्यक्रममा प्रमुख अतिथि रहेकी अमृता थापामगरले जनयुद्धकी पहिलो महिला सहिद दिलमाया बम्जनको बीरतालाई अगाडि बढाइएकै कारण तत्कालिन माओवादी जनयुद्ध सफल भएको धारणा व्यक्त गरिन् । महिला भनेको बच्चा जन्माउने मशिन हुन् भन्ने त्यो समयमा युद्धमा महिलाहरुले पनि पुरुष सरह बन्दुक बोकेर युद्धमोर्चामा लागेकै कारण देशले गणतन्त्र प्राप्त गरेको पनि उनको भनाई रहेको छ ।

तत्कालिन नेकपा माओवादीले वि.स. २०५३ साल पुष १९ गते रामेछापको बेथान चौकी कब्जा गर्ने क्रममा तिर्थ गौतम, फक्तबहादुर स्लामी मगर र दिलमाया बम्जनले सहादत प्राप्त गरेका थिए । माओवादीले बेथान चौकी आक्रमणबाट हतियार कब्जा गर्न सफल भएको थियो । शुक्रवार सो कार्यक्रम देशैभर सम्पन्न गरिएको छ ।
कार्यक्रम अनेमसंंघ(क्रान्तिकारी) काठमाडौँ जिल्ला समन्वय समितिकी संयोजक सरिता शिवभक्तिको अध्यक्षता र सचिव मञ्जु पुडासैनीको संचालनमा सम्पन्न भएको थियो ।