नवलपुर । देवचुली नगरपालिकामा २७ सय ६० किशोरीहरू एच.पी.भी खोप खोपबाट लाभान्वित हुने भएका छन् । यो खोप अभियान माघ २२ गतेदेखि देशव्यापी रूपमा सुरु भएको थियो । खोप अभियानमा देवचुलीका १० देखि १४ वर्ष उमेर समूहका ६ देखि १० कक्षा सम्म अध्ययनरत बालिका सहभागी हुनेछन् ।
आइतबार कार्यक्रमको आयोजना गरी नगरपालिकाका सबै वडामा डा.ज्योति गौतमको नेतृत्वमा खोप अभियान सञ्चालन गरिने बताइएको छ ।
नगरपालिकाका स्वास्थ्य शाखा प्रमुख तथा जनस्वास्थ्य अधिकृत रामकुमार श्रेष्ठले खोप अभियानमा विद्यालय बाहिर रहेका बालिकाहरूलाई पनि सहभागी गराइने बताए ।
कार्यक्रममा नगरप्रमुख हरिप्रसाद न्यौपानेले निःशुल्क खोपको पहुँचबाट बालिका वञ्चित हुन नहुने बताए । उनले शिक्षा र स्वास्थ्य नागरिकको अत्यावश्यक हुँदा यसको व्यवस्थापनमा नगरपालिका गम्भीर रहेको बताए ।
एच.पी.भी खोप नगरपालिका भित्रका ४१ जना स्वयंसेविका र खोप केन्द्र राखिने विद्यालयका दुई जना शिक्षिकालाई पनि उक्त खोप दिइनेछ । महिलाहरूमा हुने क्यान्सर मध्य मृत्युको चौथो कारण पाठेघरको क्यान्सर भएको हुँदा खोपको उद्देश्य महिलाहरूमा पाठेघरको क्यान्सरको जोखिम कम गर्नु रहेको छ ।
वि.सं.२०८१ माघ १३ आइतवार १५:३३ मा प्रकाशित
