हामी सबैकाे संसारन्यूज

काठमाडौं । राष्ट्रिय स्वतन्त्र पार्टी (रास्वपा)का सांसद शिशिर खनालले काठमाडौंको तारकेश्वर–९ स्थिति लोकतान्त्रिक चोकमा हरेको नेवार समुदायको मचागा चिहानको जग्गा नेपाली कांग्रेसका नेताले हडपेको आरोप लगाएका छन् ।

आज प्रतिनिधिसभाको बैठकमा बोल्दै उनले तारकेश्वर-९ स्थिति लोकतान्त्रिक चोक कब्जामा लिई भोगचलन गरेको आरोप लगाएका हुन् । उनले कांग्रेसका कुन नेताले हडपेको भन्ने नखुलाइ यस्तो आरोप लगाएका हुन् ।

सांसद खनालले भने,“काठमाडौं क्षेत्र नं. ६ मा पर्ने तारकेश्वर-९ को लोकतान्त्रिक चोकमा रहेको नेवार समुदायको चिहान रहेको जग्गा, नेपाल सरकारको नाममा रहेको जग्गा कित्ता नं. ६२/६३ नेपाली कांग्रसका नेताले कब्जामा लिइ भोगचलन गर्दै आइरहेको र स्थानीयवासीको गुनासो र उजुरीको वाबजुद स्थानीय निकायले उक्त जग्गा संरक्षणमा ल्याउन कुनै पहल नगरेको आम गुनासो छ” ।

सांसदको यस्तो आरोपपछि कांग्रेस नेताहरूले उठेर विरोध जनाएका थिए । कांग्रेसका सांसद राजेन्द्र बजगाईंले सुरुमा उठेर यस विषयमा आपत्ति जनाएका थिए । फोटो:रासस