हामी सबैकाे संसारन्यूज

काठमाडौँ । काठमाडौँको ट्राफिक व्यवस्थापन अस्तव्यस्त भएको छ । शिक्षक तथा कर्मचारीहरूले कार्यालय समयमा गरेको प्रदर्शनका कारण ट्राफिक व्यवस्थापन अस्तव्यस्त भएको हो ।

शिक्षक कर्मचारीहरू बिजुली बजार क्षेत्रमा भेला भएर प्रदर्शन गरिरहेका छन् । त्यसैले प्रहरीले माइतीघरबाट–बबरमहल–नयाँबानेश्वरतर्फ जान सवारी साधनलाई रोक लगाएको छ ।

नयाँबानेश्वर चोकबाट पनि बबरमहलतर्फ जान सवारी साधनलाई रोक लगाइएको छ । त्यसतर्फ जाने सवारी साधनहरूलाई संसद् भवन पश्चिम गेट हुँदै थापा गाउँतर्फ पठाइएको छ । यसै गरी शंखमुल र नयाँबानेश्वरतर्फ पनि सवारी साधनलाई डाइभर्सन गरिएको छ ।

मुख्य सडकबाट सवारी साधनलाई डाइभर्सन गरिएपछि साँघुरा र भित्री सडकहरूमा गाडीहरूको चाप छ । त्यसैले ठाउँ–ठाउँमा ट्राफिक जामको समस्या छ ।

नियमित रुट बदलेर यात्रा गर्दा र लामो समयसम्म जाममा पर्दा सवारी चालक तथा यात्रुहरू मर्कामा परेका छन् ।