Sansar News
स्याङ्जा । स्याङ्जाको बिरुवा गाउँपालिकाले संस्थागत विद्यालयमा कार्यरत शिक्षक, शिक्षिका तथा कर्मचारीहरूलाई विद्यालय खोलेर भर्ना तथा पठनपाठनका गतिविधि सञ्चालन गर्न अनुरोध गरेको छ ।
मङ्गलवार गाउँपालिकाका अध्यक्ष सूर्यबहादुर कुँवरद्वारा हस्ताक्षरित एक सूचना प्रकाशित गर्दै गाउँपालिका भित्र रहेका सम्पूर्ण विद्यालयहरूले तत्काल विद्यालय सञ्चालन गरी भर्ना, पठनपाठन लगायत सम्पूर्ण क्रियाकलाप सुचारु गर्न अनुरोध गरेको हो ।
गाउँपालिकाले सूचनामार्फत लामो समय देखि देशमा चलिरहेको शिक्षक आन्दोलनले शैक्षिक सत्र २०८२ सालको विद्यालय भर्ना, कक्षा सञ्चालन तथा पठनपाठनमा बाधा परेको भनी अभिभावक तथा सरोकारवालाको गुनासो आएकाले सूचना प्रकाशन गरेर विद्यालयका गतिविधि सञ्चालन गर्न आग्रह गरेको छ ।
नयाँ शैक्षिक सत्र सुरु भएदेखि हालसम्म कुनै पनि संस्थागत विद्यालय सञ्चालन नभएको पाइएकाले समेत विद्यालय सञ्चालन गर्न आग्रह गरिएको गाउँपालिकाका अध्यक्ष कुँवरले बताएका छन् ।
वि.सं.२०८२ वैशाख १० बुधवार १२:४४ मा प्रकाशित
