हामी सबैकाे संसारन्यूज

काठमाडौं। नियात्राकार प्रदीप सापकोटाको नियात्राकृति ‘यात्राको लय’ माथि परिचर्चा कार्यक्रम सम्पन्न भएको छ। शुक्रबार उत्पला क्याफे बौद्धमा भएको कार्यक्रममा विभिन्न समीक्षक एवं चर्चाकारहरुले यात्राको लयमाथि परिचर्चा गरे ।

उक्त कार्यक्रममा सपाट वर्णनमात्र नियात्रा नहुने भन्दै वरिष्ठ साहित्यकार श्रीओम श्रेष्ठ’रोदन’ ले पचासको दशकपछि नियात्रा नेपाली साहित्यमा थप चलायमान भएर आएको बताए । प्रदीप सापकोटाको यात्राको लयमा पाठकलाई सँगै डोर्याएर लान सक्ने सामाथ्र्य रहेको बताए । उनले भने “निजात्मक अनुभूति र भावनालाई स्थानीयतामा डुबेर नियात्रा लेखेका छन्। यसले उनको नियात्रामा खुवी देखाएको छ । नियात्राकारले थप उचाई लिने सृजना गर्न कृतिले चूनौति थपिदिएको छ।”

अर्का चर्चाकार वरिष्ठ नियात्राकार जय छाङ्छाले ‘यात्राको लय’ मार्फत प्रदीप सापकोटाले एउटा आशावादी नियात्राकारको रुपमा आफुलाई उभ्याएको बताए । उनले भने( “सिद्धान्त र बिम्ब विधानहरु समावेश गरिएका नियात्राहरु बलिया रहेका छन् । वास्तवमा नियात्रा राम्रा छन् कि छैनन् भन्ने कुरा पाठकले ह्रदयले पढेपछि थाहा हुन्छ।” उनले आगामी दिनमा थप उत्कृष्ट नियात्रा लेख्नको निम्ति शुभकामना दिए ।

अर्का चर्चाकार निबन्धकार श्रीबाबु कार्कीले तत्कालिन द्धन्दकालको झल्को दिने नियात्राहरु बढी रहेको यात्राको लयमा नेपाल यात्राकै पेरिफेरिमा प्रायः नियात्राहरु रहेको बताए । उनले कृतिमाथि चर्चा गर्दै भने(“नियात्राकारले जहाँ जान्छन् त्यहाँका सुक्ष्म कुराहरु जुन कुराले उनको मन छुन्छ तिनीहरुलाई आफ्नो नियात्राको विषय बनाएका छन् । अनुभूति र नजिकका सबै दृश्यहरु नियात्राकारको ब्रम्हबाट तानिएका छन् । उनका नियात्रामा सपाट वर्णन मात्र छैन् लालित्यपूर्ण छन् ।भोगाइ छन् । पाठक तान्ने खुवी राख्छन्।”

बरिष्ठ नियात्राकार पवन आलोकले आफुले ‘यात्राको लय’ पढेको भन्दै मन छोएको बताए ।नियात्राकार सापकोटालाई आलोकले शालिन,सरल व्यक्तिको रुपमा चिनेको बताए ।

यसैगरी साहित्यिक पत्रकार संघका अध्यक्ष राधेश्याम लेकालीले कृतिकार नियात्राकार र सञ्चारकर्मी दुबैमा अब्बल देखिएको बताए ।

अर्का वक्ता डा. शैलेन्दुप्रकाश नेपालले प्रदीप सापकोटाको लेखनी राम्रै रहेको आफुलाई लागेको बताए ।
नियात्राकार प्रदीप सापकोटाले रहरले लेख्न सुरु गरेकोमा थप जिम्मेवार भएर लेख्न पर्ने महसुस गरेको बताए । उनले उपस्थित सबैप्रति आभार प्रकट पनि गरे ।

सुसेलीका प्रवद्र्धक दुर्गाप्रसाद अधिकारी ‘भमरकोटे’ले केही सुसेली प्रस्तुत गरे । सुनकोसी वाङ्मय प्रतिष्ठानका अध्यक्ष छविरमण सिलवालको सहजीकरणमा सम्पन्न उक्त कार्यक्रममा स्वागत मन्तव्य कोषाध्यक्ष तारा केसीले राखेकी थिइन् ।
उक्त कार्यक्रममा साहित्यक्षेत्रका विभिन्न अग्रजहरुको सहभागिता थियो ।