हामी सबैकाे संसारन्यूज

स्याङ्जा । स्याङ्जामा विभिन्न मुद्दामा फरार रहेका बिहीबार आठ जना कसुरदार पक्राउ परेका छन् ।

जिल्ला प्रहरी कार्यालय स्याङ्जाबाट खटिएको विशेष अप्रेसन टोलीले अदालतबाट विभिन्न मितिमा मुद्दा फैसला भई कैद तथा जरिवाना भुक्तान गर्न बाँकी रहेका आठ जना फरार कसुरदारलाई पक्राउ गरिएको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्न राज चौधरीले जानकारी दिए ।

चौधरीका अनुसार कैद भुक्तान साथै एक करोड ६१ लाख आठ हजार चार सय ४२ रुपैयाँ जरिवाना असुलको लागि उनीहरुलाई जिल्ला अदालतमा उपस्थित गराईएको छ ।

भिम बहादुर विश्वकर्मालाई २३ दिन कैद र ८० लाख, कमला के.सीलाई ७९ लाख ८८ हजार, बत्ती बि.कलाई एक दिन कैद र एक लाख, शिवलाल लम्साल १६ हजार सात सय ५० रुपैयाँ जरिवाना तोकिएको थियो । उनीहरु सबै बैंकिङ कसुरका कसुरदार हुन् ।

यस्तै झबनाथ भण्डारी दुई हजार, अमराज गुरुङ एक हजार, गंगा माया गुरुङ्सेनी पाँच सय ८२ रुपैयाँ, २४ दिन कैद ढाल बहादुर सुनारलाई एक सय १० रुपैयाँ जरिवाना तोकिएको थियो । ढालबहादुर कुटपिट र बाँकी चेकअनादरका कसुरदार रहेको सूचना अधिकारी चौधरीको भनाइ छ ।