हामी सबैकाे संसारन्यूज

काठमाडौँ । नेपाल बैंक लिमिटेडले केही नेपाली सञ्चार माध्यमहरुले यस वैंकवाट आर्थिक वर्ष २०७४/७५ मा २० अर्व ४० करोड १५ लाख रुपैया गायव भएको भनी प्रकाशित गरेको भ्रामक, झुटो र तथ्यहिन समाचार भएको बताएको छ । बैंकले बुधबार एक विज्ञप्ति जारी गर्दै त्यस भ्रमपूर्ण समाचारप्रति बैंकको गम्भीर ध्यानाकर्षण भएको जनाएको छ ।

बैंकले नेपाल राष्ट्र बैंकबाट जारी निर्देशन तथा प्रचलित नेपाल कानून बमोजिम आफ्नो हिसाबकिताब राख्दै आएको, नियामकीय निकायलाई बैंकको अनुपालनाका विषयमा पूर्ण जानकारी भएको र बैंकका लेखापरीक्षण भएका वित्तीय विवरणहरु त्रैमासिक तथा वार्षिक रुपमा सबैको जानकारीको लागि सार्वजनिक गर्ने गरिएको विज्ञप्तिमार्फत जानकारी दिँदै यस्ता भ्रामक समाचारहरुमा विश्वास नगर्न सम्वन्धित सबैमा आग्रह गरेको छ ।

वित्तीय रुपमा सुदृढ रहनुको साथै नियामक निकायको नीति तथा निर्देशनहरु पूर्ण पालनामा प्रतिवद्ध रहेको तथ्य श्री नेपाल सरकार, ग्राहकवर्ग, नियामक निकाय लगायत सम्पूर्ण सरोकारवालाहरुमा विश्वस्त पार्न चाहेको समेत बैंकले जनाएको छ ।