हामी सबैकाे संसारन्यूज

काठमाडौं । नेपाल राष्ट्र बैंकले २१ अर्ब रुपैयाँ बराबरको नयाँ नोट छाप्नका लागि टेन्डर आह्वान गरेको छ । राष्ट्र बैंकको मुद्रा व्यवस्थापन विभागले सूचना जारी गर्दै ५० रुपैयाँ दरका ४२ करोड थान नोट छाप्नका लागि अन्तर्राष्ट्रिय बोलपत्र आह्वान गरेको जानकारी दिएको हो ।

बैंकले पूर्वयोग्यता सेक्युरिटी प्रिन्टरहरूबाट बोलपत्र मागेको छ । अन्तर्राष्ट्रिय प्रतिस्पर्धात्मक बोलपत्र प्रक्रिया मार्फत नोटको डिजाइन, छपाइ, आपूर्ति तथा डेलिभरीका लागि यो ठेक्का खुलाइएको हो ।

इच्छुक पूर्वयोग्य सूचीमा रहेका कम्पनीहरूले सन् २०२५ सेप्टेम्बर ८ को दिउँसो १२ बजेभित्र आफ्नो बोलपत्र राष्ट्र बैंकको मुद्रा व्यवस्थापन विभागमा बुझाइसक्नु पर्ने सूचनामा उल्लेख छ । बोलपत्र सोही दिन दिउँसो १ बजे खोलिने छ ।

यसअघि अगस्ट १७ मा प्रि–बिड बैठक आयोजना गरिनेछ । बोलपत्रमा सहभागी हुन चाहने कम्पनीले २० हजार नेपाली रुपैयाँ वा (१४६ अमेरिकी डलर, १२६ युरो, १०९ पाउन्ड स्टर्लिङ) तिरेर बोलपत्र फारम खरिद गर्न सक्नेछन् । साथै, बोलपत्र पेस गर्दा न्यूनतम ४ करोड रुपैयाँ बराबरको बिड सेक्युरिटी पनि पेस गर्नुपर्ने सूचनामा उल्लेख छ