हामी सबैकाे संसारन्यूज

काठमाडौं । राष्ट्रिय प्रजातन्त्र पार्टी (राप्रपा) का निर्वाचित केन्द्रीय सदस्य किशोर बहादुर कार्कीले पार्टी परित्याग गरेका छन् ।
बिहीबार प्रेस विज्ञप्ति जारी गर्दै उनले नेतृत्वको स्वेच्छाचारी प्रवृत्ति, गुटबन्दी, भागबन्डा र हैकमवादी शैलीबाट निराश भएर पार्टी छाड्ने निर्णय गरेको बताए ।

पार्टी अध्यक्षले विमति राख्ने कार्यकर्तालाई पाखा लगाएर चाप्लुसी गर्नेलाई संरक्षण दिएको उनको आरोप छ । उनले वर्तमान नेतृत्वले पार्टीलाई विधिविहीन ढङ्गले सञ्चालन गरेको दाबी गरे ।

पार्टीमा विचारभन्दा पद, सेटिङ र साँठगाँठलाई प्राथमिकता दिइएको, पुराना कार्यकर्तालाई पाखा लगाएर अयोग्य र नवप्रवेशीलाई जिम्मेवारी दिइएको तथा बारम्बार चुनाव चिन्ह परिवर्तनले कार्यकर्तामा निराशा बढेको उनको तर्क छ ।

साधारण सदस्यता समेत त्याग्दै कार्कीले कुनै दल वा गुटमा नरही स्वतन्त्र रूपमा राष्ट्र र जनताको सेवामा रहने बताए । पूर्वमधेस प्रदेश संयोजक, प्रवक्ता र अनुशासन समिति सदस्य सचिव रहेका कार्कीको बहिर्गमनले राप्रपाभित्रको आन्तरिक कलह सतहमा आएको छ ।