Sansar News
बैठकलाई सम्बोधन गर्दै अध्यक्ष केपी शर्मा ओलीले नेपालको कम्युनिष्ट आन्दोलन ऐतिहासिक घटनाक्रमबाट अघि बढ्दै आएको उल्लेख गर्दै राष्ट्रिय स्वाभिमानका साथ देशको शिरमाथि उठाउने शक्ति एमाले मात्रै भएको बताए। उहाँले लोकतन्त्र, शान्ति, विकास, सामाजिक न्याय र समृद्धिको लयमा मुलुकलाई फर्काउन सबै कार्यकर्ताले एकताबद्ध भएर लाग्नुपर्नेमा जोड दिनुभयो।
ओलीले बैठकमा समसामयिक राजनीतिक प्रतिवेदन प्रस्तुत गर्नुभएको छ र बैठकले आगामी राजनीतिक दिशा र रणनीतिबारे गम्भीर छलफल गर्ने बताइएको छ।
यसअघि असोज २६ गते सम्पन्न केन्द्रीय सचिवालय बैठकले आउँदो मङ्सिर अन्तिम साता पार्टीको ११औँ राष्ट्रिय महाधिवेशन आयोजना गर्ने निर्णय गरेको थियो।
बैठकका लागि समसामयिक प्रस्ताव लेखन समिति गठन गरिएको छ, जसमा उपमहासचिव प्रदीप ज्ञवाली, स्थायी कमिटी सदस्य राजेन्द्र गौतम र विघटित प्रतिनिधिसभाका प्रमुख सचेतक महेश बर्तौला सदस्य रहेका छन्।
महासचिव शङ्कर पोखरेलले सबै केन्द्रीय सदस्यलाई तोकिएको समयमा बोल्ने अवसर उपलब्ध गराइने जानकारी दिनुभएको छ। बहस नोट संकलनको जिम्मेवारी पोलिटब्युरो सदस्य सूर्य थापा र केन्द्रीय सदस्य विष्णु रिजाल तथा निरज आचार्यलाई दिइएको छ।
बैठकमा अध्यक्ष ओलीले गत भदौ २२ गते सम्पन्न दोस्रो विधान महाधिवेशनबाट निर्वाचित केन्द्रीय निर्वाचन आयोगका अध्यक्ष डा. विजय सुब्बालाई पद तथा गोपनीयताको शपथ गराउनुभएको छ। शपथपछि आयोगले आफ्नो कार्य औपचारिक रूपमा सुरु गरेको बताइएको छ।
बैठकमा सहभागी नेताहरूले पार्टीलाई आगामी निर्वाचनका लागि सुदृढ बनाउने दिशामा ठोस निर्णय हुने विश्वास व्यक्त गरेका छन्।
