हामी सबैकाे संसारन्यूज

काठमाडौँ । क्रान्तिकारी कम्युनिष्ट पार्टी नेपालका केन्द्रीय सदस्य नन्दलाल खरेल र स्कुलिङ विभागका सचिव भगिरथ न्यौपानेले पार्टी सदस्यतासहित पद परित्याग गरेको जनाएका छन् । पार्टी परित्याग गरेका खरेल र न्यौपानेद्धारा क्रान्तिकारीहरुको एकतामा जोड दिइएको छ ।

संयुक्त विज्ञप्तिमार्फत पद त्याग गरेको बताएका खरेल र न्यौपानेले पार्टीले जडसूत्रवादलाई अँगालेको, क्रान्तिको कुरा मात्रै गर्ने तर त्यसको कार्यान्वयन नगर्ने, र पार्टीलाई गफै गफको अखडा बनाएको आरोप लगाएका छन् । उनीहरूले वैचारिक स्पष्टता र क्रान्तिकारी दिशाको अभावले संगठन निष्प्रभावी बनेको टिप्पणी समेत गरेका छन् । उनीहरूसँगै अन्य दर्जनौँ नेता तथा कार्यकर्ताले पनि सो पार्टी छोडेको विद्रोही स्रोतले जनाएको छ ।

पार्टी नेतृत्वले देशको आर्थिक, राजनीतिक र वैचारिक संकटप्रति संवेदनशील भूमिका खेल्न नसकेको भन्दै उनीहरुले वक्तव्यमा भनेका छन् ‘मुलुक अहिले गम्भीर संकटमा छ, साम्राज्यवाद र प्रतिक्रियावादी शक्तिको हस्तक्षेप बढ्दै गएको छ, तर हाम्रो पार्टी त्यसविरुद्ध ठोस कार्यक्रम ल्याउन असफल रह्यो ।’

पार्टीभित्र आन्तरिक छलफल, वैचारिक सुदृढता र अनुशासनको कमीले क्रान्तिकारी दिशा हराएको आरोप लगाएका छन् । उनीहरुका अनुसार, ‘क्रान्तिको कुरा गरेर जनतालाई आशा दिलाउने तर व्यवहारमा निष्क्रिय रहने प्रवृत्तिले आत्ममन्थन गर्न बाध्य बनायो ।’
हालको राजनीतिक परिस्थितिमा देशभक्त, जनपक्षीय र क्रान्तिकारी शक्तिहरूबीच एकता आवश्यक रहेको उनीहरुले बताएका छन । ‘साम्राज्यवाद र प्रतिक्रियावादविरुद्धको संघर्ष अहिलेको प्रमुख कार्यभार हो, त्यसका लागि सबै क्रान्तिकारी शक्ति साझा मोर्चामा उभिनुपर्छ ।’ उनीहरूको जोड रहेको छ ।

खरेल र न्यौपानेले आगामी दिनमा देशभक्त र जनमुखी शक्तिहरूसँग मिलेर नयाँ वैचारिक अभियान अघि बढाउने संकेत दिएका छन् । उनीहरूले सैद्धान्तिक स्पष्टता, वैचारिक शुद्धता र क्रान्तिकारी एकताको नारा अघि सारेका छन् ।