Sansar News
काठमाडौं । नेकपा (एकीकृत समाजवादी) ले पार्टी एकताको प्रक्रिया कमजोर पार्ने प्रयास गरेको आरोप एमाले अध्यक्ष केपी शर्मा ओलीमाथि लगाएको छ।
पार्टीका उपाध्यक्ष तथा प्रवक्ता प्रकाश ज्वाला ले विज्ञप्ति जारी गर्दै भनेका छन्— हालै सम्पन्न केन्द्रीय कमिटीको बैठकले विभिन्न वामपन्थी दलबीच एकताको ऐतिहासिक निर्णय गरेपछि ओलीले ‘घर फर्क’ भन्ने भ्रमपूर्ण प्रचार सुरु गरेर त्यसलाई भाँड्ने प्रयास गरेका छन्।
विज्ञप्तिमा यो कदमलाई एकता प्रक्रियाविरुद्धको “दुष्प्रयास” भन्दै कुनै पनि कार्यकर्ता भ्रमित नहुन र सम्पूर्ण पार्टी पङ्क्तिलाई केन्द्रीय कमिटीको निर्णयको पक्षमा दृढ रहन आह्वान गरिएको छ।
बैठकले पार्टीको मार्गदर्शक सिद्धान्त मार्क्सवाद–लेनिनवाद, रणनीतिक लक्ष्य वैज्ञानिक समाजवाद, संगठनात्मक सिद्धान्त जनवादी केन्द्रीयता, र नेपाली विशेषतासहितको समाजवादी कार्यदिशा अपनाउने निर्णय गरेको छ।
त्यससँगै, जनवादी क्रान्तिका उपलब्धि र राष्ट्रिय स्वतन्त्रता जोगाउँदै सुशासन, सामाजिक न्याय, र आर्थिक–सामाजिक रूपान्तरणमार्फत समाजवादतर्फ अघि बढ्ने रणनीति तय गरिएको छ।
बैठकले नेकपा (माओवादी केन्द्र), विप्लव समूहबाट पुनर्गठित नेकपा, नेपाल समाजवादी पार्टी, नेकपा समाजवादी, र जनसमाजवादी पार्टी लगायत दलहरूलाई समेट्दै नेपालको कम्युनिस्ट आन्दोलनलाई एकताबद्ध गर्ने लक्ष्य लिएको छ।
वि.सं.२०८२ कात्तिक १६ आइतवार ११:०४ मा प्रकाशित
