हामी सबैकाे संसारन्यूज

काठमाडौं  । नेकपा एमालेको ११औँ महाधिवेशनमा युवा संघ नेपालले झण्डै ५० हजारभन्दा धेरै युवा उतार्ने तयारी गरेको छ। मंसिर २७ गते सुरु हुने महाधिवेशनको उद्घाटन कार्यक्रममा देशभरबाट युवाहरू ठूलो संख्यामा सहभागी हुने संघले जनाएको छ।

युवा संघ नेपालका अध्यक्ष क्षितिज थेबेले कम्तीमा ५० हजार युवालाई कार्यक्रमस्थलमा उपस्थित गराउने लक्ष्यसहित संगठनका सबै कमिटी परिचालन गरिएको जानकारी दिए।

संघले उपत्यकाबाट मात्रै ठूलो भीड ल्याउने तयारी गरेको छ। काठमाडौं र ललितपुरका ६१ वडाबाट एक–एक हजारका दरले ६१ हजार, उपत्यकाका अन्य १९ पालिकाबाट पनि एक–एक हजारका दरले १९ हजार, उपत्यकाबाहिर बागमतीका १० जिल्लाबाट १५ सयका दरले १५ हजार युवा उतार्ने योजना बनाइएको छ।

प्रदेशगत सहभागी संख्या यसरी तय गरिएको छ—
कोशीबाट ४ हजार, मधेशबाट ४ हजार, गण्डकीबाट ३ हजार, लुम्बिनीबाट २ हजार, कर्णाली र सुदूरपश्चिमबाट ५ सय–५ सय गरी कुल १ हजार युवा उपस्थित गराइने युवा संघले जनाएको छ।

एमालेको ११औँ राष्ट्रिय महाधिवेशन मंसिर २७ देखि २९ गतेसम्म काठमाडौंमा हुनेछ। उद्घाटन सत्र भक्तपुरको सल्लाघारीस्थित तीनकुने मैदानमा र बन्दसत्र भृकुटीमण्डपमा सञ्चालन हुने बताइएको छ।