हामी सबैकाे संसारन्यूज

अमेरिका । अमेरिकाको न्यूर्योकमा लिम्बु समुदायको प्रमुख सांस्कृतिक पर्व चासोक तङनाम सन् २०२५ भव्यरुपमा मनाइएको छ ।
डिसेम्बर २० का दिन सम्पन्न कार्यक्रममा समुदायका सदस्यहरू, परिवारजन तथा शुभेच्छुकहरू एकत्रित भई आफ्नो संस्कृति, परम्परा र एकतालाई सम्मान गर्दै मनाइएको हो ।

चासोक तङनाम लिम्बु समुदायको प्रमुख कटनी (बाली भित्र्याउने) पर्व हो। यस पर्वमा सफल बाली, राम्रो स्वास्थ्य तथा समृद्धिका लागि परम पूज्य देवता तागेरा निङ्वाफुमाप्रति कृतज्ञता व्यक्त गरिन्छ ।
यो पर्व प्रकृतिसँगको सामञ्जस्य, सांस्कृतिक निरन्तरता तथा समुदायबीचको एकताको प्रतीक हो । कार्यक्रममा समुदायका अग्रज तथा आस्थाका संरक्षकहरूले चासोक तङनामको ऐतिहासिक, सांस्कृतिक र आध्यात्मिक महत्वबारे स्पष्ट व्याख्या गर्दै परम्परागत पूजा–आराधनाको शुभारम्भ गरेका थिए ।

कार्यक्रममा लिम्बु परम्परागत नृत्यहरू तथा विविध सांस्कृतिक प्रस्तुतिहरू देखाइयो, जसले समुदायको समृद्ध सांस्कृतिक सम्पदा र नयाँ पुस्तामा संस्कृतिप्रतिको चेतनालाई उजागर ग¥यो । सहभागीहरूले परम्परागत खानपानको समेत आनन्द लिए, जसले कार्यक्रमलाई अझ आत्मीय र उल्लासमय बनाएको थियो ।

युवा कलाकारको आकर्षक प्रस्तुतिले कार्यक्रमलाई थप जीवन्त बनायो । साँझको विशेष आकर्षणका रूपमा ‘द भ्वाइस नेपाल किड्स’ की उपविजेता रुक्साना लिम्बुको सुमधुर प्रस्तुति रह्यो ।
उनको प्रस्तुतिमा जीतेन राईको ‘मालिङ्गो काट’ को प्रयोगले परम्परागत स्वाद थप्दै सांस्कृतिक भावनालाई अझ गहिरो बनायो ।

कार्यक्रमकी प्रमुख अतिथि श्रीमती इन्दिरा चोङबाङ, आदिवासी महिला महासंघकी अध्यक्ष तथा न्युयोर्क सहरमा विभिन्न सामाजिक तथा सामुदायिक संस्थासँग आबद्ध चर्चित अभियन्ता तथा सामाजिक कार्यकर्ताहरू विशेष अतिथिका रूपमा सहभागी थिए ।

न्युयोर्कमा सम्पन्न चासोक तङनाम २०२५ ले विदेशमा रहेका लिम्बु समुदायबीच सांस्कृतिक गौरव, पुस्तान्तरणीय सम्बन्ध तथा एकताको भावना अझ सुदृढ बनाएको सन्देश दिएको छ ।