हामी सबैकाे संसारन्यूज

आगामी फागुन २१ गते सम्पन्न हुने संघीय संसद, प्रतिनिधि सभाको निर्वाचन अन्तरगत समानुपातिक निर्वाचन प्रणालीको बन्द सूचिमा नयाँ भनिएको दल राष्ट्रिय स्वतन्त्र पार्टी (रास्वपा)ले विधिपद्धति विपरित सामानुपातिक प्रणालीकै धज्जी उडाएको भन्दै चौतर्फी विरोध भएको छ ।
समानुपातिक निर्वाचनको बन्द सूचिमा दलितका नाममा प्रकास सपुत, महिलाका नाममा पूर्व मिस नेपाल, खस आर्यको ठाउँमा अरबपतिका छोरा लगायतलाई समेटिएको भन्दै समाजिक सञ्जालहरुमा चर्को विरोध भएपछि भर्खरै सहकारी ठगी मुद्दामा रुपन्देही जिल्ला अदालतले धरौटीमा छोडेका रास्वपा सभापति रवि लामिछानेले पत्रकार सम्मेलन गरी बन्द सूची सच्चाउने बताएका छन् ।
निर्वाचन आयोगले समानुपातिक निर्वाचन प्रणाली अन्तरगत दलित, आदिवासी जनजाति, खस आर्य, मधेशी, थारु, मुस्लिमलाई नेपालको जनसंख्याको बनोट अनुसार समानुपातिक प्रतिनिधित्व हुनेगरी बन्द सूचीमा नाम समावेस गर्नुपर्ने व्यवस्था गरेको छ । त्यसमा ५० प्रतिशत महिला अनिवार्य रहेको छ ।