हामी सबैकाे संसारन्यूज

नवलपुर । पिपुल्स बचत तथा ऋण सहकारी संस्था लिमिटेडको १४औँ वार्षिक साधारण सभा सम्पन्न भएको छ ।

साधारण सभामा युवा स्वरोजगार कोष नवलपुरका सदस्य सचिव तथा प्रमुख अतिथि प्रितम भुजेलले सहकारीमार्फत स्थानीय स्तरमा बचत, ऋण तथा स्वरोजगार प्रवद्र्धनमा महत्वपूर्ण भूमिका निर्वाह भइरहेको उल्लेख गरे । उनले सहकारीलाई आत्मनिर्भर, पारदर्शी र सदस्य–केन्द्रित बनाउँदै लैजानुपर्नेमा जोड दिँदै युवालाई स्वरोजगारमा जोड्न सहकारी र युवा स्वरोजगार कोषबीच सहकार्यको आवश्यकता रहेको बताए ।

कार्यक्रमको अध्यक्षता सहकारी संस्थाका अध्यक्ष श्याम प्रसाद सुवेदीले संस्थाको वार्षिक प्रगति प्रतिवेदन, आर्थिक अवस्था, उपलब्धि र चुनौतीहरूबारे जानकारी गराए । उनले सहकारीलाई दिगो र सुदृढ बनाउने दिशामा आगामी दिनमा थप योजना कार्यान्वयन गरिने बताए ।

सभामा हुप्सेकोट गाउँपालिका १ का वडा अध्यक्ष विष्णु रानाले सहकारीले स्थानीय आर्थिक विकास, उद्यमशीलता प्रवद्र्धन तथा सामाजिक उत्तरदायित्वमा खेलेको भूमिकाको प्रशंसा गरे ।
साधारण सभामा संस्थाको आर्थिक प्रतिवेदन, लेखा परीक्षण प्रतिवेदन, आगामी आर्थिक वर्षको कार्ययोजना तथा बजेटमाथि छलफल गरी अनुमोदन गरिएको थियो ।

कार्यक्रममा सहकारीका उत्कृष्ट शेयर सदस्य तथा कर्मचारीलाई सम्मान गरिएको थियो ।सहभागीहरूले सहकारीलाई अझ प्रभावकारी, पारदर्शी र उत्तरदायी बनाउँदै लैजानुपर्नेमा जोड दिएका थिए । सस्थाले उत्कृष्ट बचत कर्ता लाई सम्मान गरेको थियो ।

कार्यक्रममा सहकारीका शेयर सदस्य, सञ्चालक समिति, लेखा समितिका पदाधिकारी तथा स्थानीय सरोकारवालाको उल्लेखनीय सहभागितामा कार्यक्रम सम्पन्न भएको हो।