हामी सबैकाे संसारन्यूज

काठमाडौं । नेपाल लेयर्स कुखुरापालक संघले अन्डाको मूल्य प्रतिक्रेट ९० रुपैयाँ घटाएको छ। संघले मंगलबारदेखि लागू हुने गरी नयाँ मूल्यसूची सार्वजनिक गरेको हो।

नयाँ मूल्यअनुसार अब मध्यम (मिडियम) अन्डाको किसानले पाउने मूल्य प्रतिक्रेट ४६० रुपैयाँ कायम गरिएको छ। यसअघि यसको मूल्य ५५० रुपैयाँ थियो। त्यसैगरी ठूलो (लार्ज) अन्डाको मूल्य ५६५ रुपैयाँबाट घटाएर ४७५ रुपैयाँ तोकिएको छ।

अन्डाको मूल्य घटेसँगै पछिल्लो समय चर्को मूल्य तिर्दै आएका उपभोक्तालाई केही राहत मिल्ने अपेक्षा गरिएको छ। गएको मंसिर महिनामा उच्च भएको अन्डाको मूल्य करिब एक महिनापछि घटाइएको हो।

संघका अध्यक्ष विनोद पोखरेलका अनुसार अन्डाको मूल्य घट्नुमा उत्पादनमा भएको वृद्धि र खपतमा आएको कमी मुख्य कारण हुन्। चिसो मौसमका कारण विद्यालय तथा कलेजहरू बिदा हुन थालेपछि अन्डाको नियमित खपत घटेको उनले बताए।

त्यसैगरी पर्यटकीय सिजन नभएकाले होटल तथा रेस्टुरेन्टबाट हुने मागमा पनि गिरावट आएको छ। ‘पछिल्लो समय बुढो भइसकेका लेयर्स कुखुराको बिक्री निकै कम भएको छ,’ अध्यक्ष पोखरेलले भने, ‘विस्थापन गर्नुपर्ने कुखुरा नबिकेर फार्ममै रहँदा अन्डा उत्पादन बढेको छ, तर सोही अनुपातमा बजारमा खपत हुन सकेको छैन।’

संघका अनुसार बजारको अवस्था हेरेर आगामी दिनमा मूल्य पुनरावलोकन गरिनेछ।