हामी सबैकाे संसारन्यूज

काठमाडौं । आगामी फागुन २१ गते हुने प्रतिनिधिसभा सदस्य निर्वाचनका लागि आवश्यक सम्पूर्ण मतपत्र छपाइ कार्य सम्पन्न भएको छ।

जनक शिक्षा सामग्री केन्द्र लिमिटेड का प्रबन्ध निर्देशक यदुनाथ पौडेलका अनुसार निर्वाचन आयोगले दिएको जिम्मेवारीअनुसार मतपत्र छपाइ सोमबार साँझ सकिएको हो। आजदेखि सबै मतपत्र ‘प्याकेजिङ’ गरी सम्बन्धित प्रदेशहरूमा ढुवानी सुरु गरिने उनले जानकारी दिए।

प्रबन्ध निर्देशक पौडेलले प्रत्यक्षतर्फ दुई करोड तीन लाख मतपत्र छपाइ कार्य ४० दिनमै सम्पन्न गरिएको बताए। “४२ दिनको कार्यतालिका रहे पनि ४० दिनमै काम सक्न सफल भयौँ। अब १० दिनभित्र सबै जिल्लामा मतपत्र पुर्‍याउने तयारी छ,” उनले भने।

केन्द्रले दैनिक १३ देखि १५ लाखसम्म मतपत्र छपाइ गर्दै आएको थियो। यसअघि १० लाख नमुना मतपत्र छपाइ गरी आयोगमार्फत विभिन्न स्थानमा पठाइसकिएको छ। त्यस्तै, समानुपातिकतर्फ दुई करोड आठ लाख ३० हजार मतपत्र जिल्लामा पठाउने काम पनि जारी रहेको जनाइएको छ।

पौडेलका अनुसार कर्णाली र सुदूरपश्चिम प्रदेशमा सबै मतपत्र पुगिसकेको छ भने अन्य प्रदेशहरूमा पनि १० दिनभित्र मतपत्र पुर्‍याउने गरी कार्य भइरहेको छ।