हामी सबैकाे संसारन्यूज

काठमाडौँ । बालबालिका तथा युवाहरूमा वित्तीय साक्षरता अभिवृद्धि गर्ने उद्देश्यका साथ आगामी चैत २ गतेदेखि ८ गतेसम्म (मार्च १६-२२) नेपालमा ‘ग्लोबल मनी विक २०२६’ भव्य रूपमा मनाइने भएको छ ।

सन् २०१२ देखि हरेक वर्ष ‘अर्गनाइजेसन फर इकोनोमिक को-अपरेशन एन्ड डेभलपमेन्ट’ (OECD) को संयोजनमा विश्वभर मनाइँदै आएको यस अभियानको यो १४औँ शृङ्खला हो । यस वर्षको मूल नारा ‘Smart Money Talks’ तय गरिएको छ ।

नेपाल राष्ट्र बैंकको नेतृत्व नेपालमा यस अभियानको राष्ट्रिय संयोजकको भूमिका नेपाल राष्ट्र बैंकले निर्वाह गरिरहेको छ । राष्ट्र बैंकले एक सूचना जारी गर्दै वित्तीय प्रणालीमा आबद्ध संस्थाहरू, विभिन्न संघसंस्था तथा सरोकारवाला निकायहरूलाई यस अभियानमा सक्रिय सहभागी हुन आह्वान गरेको छ ।

अभियानको मुख्य विशेषताहरू:

लक्ष्य: बालबालिका र युवाहरूमा वित्तीय ज्ञान, सीप र मनोवृत्तिको विकास गर्ने ।

पहुँच: हालसम्म विश्वका १७६ मुलुकका ७ करोडभन्दा बढी युवामाझ यो अभियान पुगिसकेको छ ।

सहभागिता: बैंक तथा वित्तीय संस्थाहरूका अतिरिक्त अन्य सामाजिक संघसंस्थाहरूले पनि वित्तीय साक्षरताका कार्यक्रमहरू सञ्चालन गर्न सक्नेछन् ।

जानकारी उपलब्ध गराउन आग्रह
नेपाल राष्ट्र बैंक, गभर्नरको कार्यालय अन्तर्गतको वित्तीय समावेशिता तथा ग्राहक संरक्षण महाशाखाले यस अभियानमा सहभागी हुने संघसंस्थाहरूलाई आफ्ना कार्यक्रमको जानकारी उपलब्ध गराउन अनुरोध गरेको छ । सहभागी हुन चाहनेले महाशाखाको इमेल flu@nrb.org.np मा सम्पर्क गर्न सक्नेछन् ।

विश्वव्यापी रूपमा सञ्चालन हुने यो अभियानले नेपालको वित्तीय साक्षरता स्तरलाई माथि उठाउन र युवा पुस्तालाई आर्थिक रूपमा सचेत बनाउन महत्त्वपूर्ण भूमिका खेल्ने विश्वास लिइएको छ ।