हामी सबैकाे संसारन्यूज

काठमाडौं । एन आई सी एशिया बैंक लिमिटेड ले आफ्नो नाममा रहेका बैंकिङ्ग तथा गैर–बैंकिङ्ग सम्पत्ति साथै धितो सुरक्षणमा रहेका सम्पत्तिहरूको लिलाम बिक्रीसम्बन्धी विस्तृत जानकारी उपलब्ध गराउन अनलाइन पोर्टल सार्वजनिक गरेको छ।

बैंकका अनुसार लिलाम बिक्रीमा राखिएका सम्पत्तिहरूको पारदर्शी र सहज जानकारी प्रदान गर्ने उद्देश्यले उक्त पोर्टल सञ्चालनमा ल्याइएको हो। पोर्टलमार्फत ग्राहकहरूले लिलाममा रहेका सम्पत्तिहरूको कित्ता नम्बर, क्षेत्रफल, फोटो, नक्सा तथा गुगल म्यापमार्फत लोकेशनसमेत हेर्न सक्नेछन्।

लिलामसम्बन्धी प्रकाशित सूचनामा रहेको क्युआर कोड स्क्यान गरी वा सिधै https://auctionassistance.nicasiabank.com मा प्रवेश गरेर सम्पूर्ण विवरण प्राप्त गर्न सकिने व्यवस्था गरिएको बैंकले जनाएको छ।

यसका साथै, कुनै सम्पत्तिबारे थप जानकारी लिन चाहने व्यक्तिहरूले सम्बन्धित सम्पत्तिको विवरणमा उपलब्ध म्यासेज बक्समार्फत आफ्नो पूरा नाम, इमेल ठेगाना, मोबाइल नम्बर र सम्पर्क ठेगाना उल्लेख गरी सिधै सन्देश पठाउन सक्नेछन्।

बैंकले उक्त पोर्टलमा नियमित रूपमा लिलामसम्बन्धी नयाँ सूचना तथा सम्पत्ति विवरण अद्यावधिक गरिने जनाएको छ। खरिद गर्न इच्छुक ग्राहकहरूले अनलाइनमार्फत नै विस्तृत जानकारी लिएर लाभ लिन सक्ने बैंकको विश्वास रहेको छ।